“Bu, bizi narahat etməyə bilməz” – Lavrovdan Ermənistanla bağlı AÇIQLAMA
“Ermənistan hazırda bir sıra problemlərlə üz-üzədir”.
Sfera.az bildirir ki, bunu Rusiyanın Xarici İşlər naziri Sergey Lavrov “TASS” informasiya agentliyinə müsahibəsində deyib. O qeyd edib ki, sözügedən problemlər Qərbin köməyi ilə həll olmayacaq:
“ABŞ və Avropa İttifaqı Rusiyadan fərqli olaraq Ermənistana və bütövlükdə Cənubi Qafqaza sülh və sabitlik gətirməyə çalışmır. Onların məqsədi fərqlidir. Yəni, Qərb Moskvanı və digər regional gücləri bölgədən sıxışdırıb çıxarmaq, Balkanlar, Yaxın Şərq və Ukraynadan sonra yeni gərginlik mənbəyi yaratmaq istəyir. Çətin vəziyyətdən çıxış yolu isə göz qabağındadır - İrəvan, Bakı və Moskvanın üçtərəfli razılaşmalarını ən yüksək səviyyədə həyata keçirmək”.
Lavrov müsahibəsində bildirib ki, son vaxtlar İrəvan NATO və onun ayrı-ayrı üzv ölkələri ilə əməkdaşlığı inkişaf etdirir:
“Bu il Ermənistan Alyansın bir neçə tədbirində iştirak edib. O, silahlı qüvvələrini NATO standartlarına uyğun modernləşdirməyə davam edir, təlimlər keçirilir. Bu, bizi narahat etməyə bilməz. Biz dəfələrlə erməni həmkarlarımızın diqqətinə çatdırmışıq ki, NATO-nun əsl məqsədi regionda öz mövqelərini möhkəmləndirmək və “parçala, hökm sür” sxemi ilə manipulyasiyaya şərait yaratmaqdır. Ümid edirəm, İrəvan Alyansla qarşılıqlı əlaqələrin dərinləşməsinin milli müdafiə və təhlükəsizlik sahəsində suverenliyin itirilməsinə səbəb olduğunu bilir”.
Rusiyalı nazir həmçinin qeyd edib ki, Ermənistan Cənubi Qafqazda Moskva üçün strateji tərəfdaş olub və belə də qalır: “Əminik ki, bütün çətinliklər müvəqqətidir və siyasi iradə olarsa, aradan qaldırılacaq”.
Günay