Bir yerinizi kəsdiyiniz zaman ağrı hiss etmədiyinizi düşünün. Olduqca cazibədar səslənir, elə deyilmi? Təkcə bu xüsusiyyət də kifayət deyil. Fərz edin ki, yuxuya ehtiyacınız yoxdur, heç yorulmursunuz və aclıq hiss etmirsiniz. Qeyri-mümkün görünsə də, bu bir həqiqətdir.
 

Sfera.az bildirir ki, tibb dünyasını şoka salan və "bionik qız" kimi tanınan Olivia Farnsworthda müşahidə olunan simptomlara dünyada ilk dəfə rast gəlinir.
 

İngiltərədən olan 13 yaşlı Olivia Farnsworth unikal xromosom çatışmazlığı ilə doğulub. Bu əskikliyə görə o, ağrı və ya təhlükə hiss edə bilməz. Təkcə bununla da məhdudlaşmır. Eyni zamanda o, aclığın, yuxusuzluğun, yorğunluğun nə olduğunu bilmir. Bütün bu uyuşmanın səbəbi isə altıncı xromosomun olmamasıdır. Eyni zamanda, kiçik qız dünyada bir bədəndə üç əlaməti olan ilk və yeganə insandır.


Bəs altıncı xromosom çatışmazlığı nədir?


170 milyondan çox əsas cütümüz olan altıncı xromosom DNT-də 5,5-6% nisbətinə malikdir və DNT-nin əsas “tikinti materialı”dır. Bu xromosom sayəsində bədən və immunitet reaksiyaları ölçülür. Olivia Farnsworthun bu halına isə bu xromosoma malik olmaması səbəb olur. Dünyada indiyədək bu pozğunluğu olan heç bir xəstə qeydə alınmayıb. Tibb dünyası hələ də bu nadir xəstəliyin mənbəyini tapmağa çalışır.
Demək olar ki, bir həftə yemək yemədən dayana bilər.

Altıncı xromosom olmaması səbəbindən Olivia beş və ya altı gün yemək yemədən qala bilər. Təbii ki, bu müddət ərzində o, yuxusuzluq da hiss etmir. Fantastik film personajından heç bir fərqi olmayan kiçik qızın hekayəsi eşidənləri heyrətə gətirir. Bu maraqlı pozğunluğa görə bionik qız demək olar ki, fövqəlbəşəri xüsusiyyətlərə malikdir. Buna görə həkimlər onu "super insan" adlandırırlar.

Bəs ona bu diaqnoz ilk dəfə nə vaxt qoyulub?
 

Oliviyaya 2016-cı ildə bu nadir xəstəlik diaqnozu qoyulub. Kiçik qız anası ilə çöldə vaxt keçirərkən onu maşın vuraraq, yüz metr sürüyüb. Qorxudan qışqıran anasına tərəf gedən qızın baxışları isə vəziyyəti anlamamış kimi görünürdü. Anasına yaxınlaşanda isə sadəcə: “Nə olub”?-deyə soruşub. Qəzanın təsirindən ciddi zədə alan Oliviyanın sinəsində təkər izləri, ayaq barmaqları və omba nahiyəsində xəsarətlər olub, dərisi soyulub. Təbii ki, o, bütün bunları əsla hiss etməyib. Başqa bir qəzada isə balaca qız çox bərk yıxılıb və dodağı kəsilib. Vəziyyəti valideynlərindən gizlədən Oliviya ağır plastik əməliyyat keçirməli olub.
Bu pozğunluq kiçik qızın həyatını həm də riskə atır.


Unikal və inanılmaz səslənsə də, bu, əslində çox riskli bir xəstəlikdir. Oliviyanın uyuşması onu hətta ölümə də apara bilərdi. Buna görə də kiçik qızın anası Nikki Trepak onun hər ehtiyacına diqqətlə yanaşır. Anası Oliviyaya yemək saatlarını atlamadan yeməyə kömək edir. Yeməkdə heç bir problemi olmayan qız üçün ən çətin şey yatmaqdır. Yata bilməyən və hər axşam yuxu dərmanı qəbul etmək məcburiyyətində qalan Olivia üçün bu vəziyyət olduqca çətin olur. Eyni zamanda, ağrı hissi olmadığından, daxili zədələr və ya hər hansı bir xəstəlik üçün müəyyən aralıqlarla yoxlanılmalıdır.
 

O da digər uşaqlar kimi bir həyat yaşayır.


Olivia Farnsworth ailəsinin dəstəyi ilə digər uşaqlar kimi bir həyat yaşayır. Məktəbdə əlaçı şagird olan balaca qızın idmanda da çox yüksək nailiyyətləri var. Oliviyanın yeganə pis xüsusiyyəti odur ki, dostları onu təhrik edəndə və onu uduzan kimi görəndə çox əsəbiləşir. Belə bir vəziyyətlə qarşılaşdıqda onlara zərər vurmağa çalışır və ya öz başını divara çırpır. Valideynləri bu məsələyə çarə tapmaq üçün psixiatriyaya müraciət ediblər. Həkimlərin fikrincə, bu qəzəbin mənbəyi də xromosom pozuntusudur.
 

Kiçik qızın müalicə olunub-olunmayacağı bəlli deyil.
 

Həkimlər bu nadir halın müalicəsinin olub-olmadığını bilmirlər. Çünki Oliviyanın xəstəliyi tarixdə bir ilkdir. Buna görə də Oliviyanın anası xəstəlik haqqında məlumat yaymaq və bu xəstəliyə tutulanların olub-olmadığını öyrənmək üçün platforma yaradıb. Ümid edirik ki, Oliviyanın vəziyyətinə çarə tapılacaq və balaca qızcığaz sağlam həyat sürəcək.

Aynil

Sfera.az