Yeni il ərəfəsində bütün ölkələrdə olduğu kimi bizdə də xüsusən, şəhərin mərkəzində şaxta baba və qar qızlar olur. Film və kitablardan xəyal etdiyimiz şaxta babalar yaşlı olsa da, Bakının “Tarqovu” (Nizami) küçəsində olanların əksəriyyəti cavan oğlanlardır. 

Sfera.az xəbər verir ki, məsələ ilə bağlı texnobloqçu Fərid Pərdəşünas bildirib ki, şəhərdə Yeni İl ab-havasını pozan şaxta babalar çoxdur:

“Mən uzun müddətdir, heç olmasa əsl şaxta babaya az da olsa, oxşayan şaxta baba görə bilmirəm. Mərkəzdə gəzənlər arıq cavan uşaqlar, köhnəlmiş geyim və altdan çıxan qara ayaqqabılar. Tədbirlərə gələn şaxta babalar da özlərini kloun kimi aparır. 

Şaxta babalar yalançı bığdan başlayan ağ pambıq saqqalla gəzirlər. Bu, nə saxtakarlıqdır? Baxırsan ki, şaxta baba siqaret çəkir. Hanı sənin ceyranın? Hanı araban? Şəhərdə ən az velosiped zolaqları qədər bu məsələyə diqqət ayrılmalı və mərkəzə normal ağsaqqal şaxta babalar cəlb olunmalıdır”.

Firuzə Əliyeva