COVID-19 geri dönür - ÜST-dən sürətlə yayılan virusla bağlı XƏBƏRDARLIQ

Ümumdünya Səhiyyə Təşkilatı (ÜST) COVID-19-un yeni variantı ilə bağlı xəbərdarlıq edib.

Sfera.az bildirir ki, “Omicron”un alt variantı olan “JN.1” artıq Hindistan, Çin və ABŞ-də aşkarlanıb. Qurum rəsmiləri qeyd ediblər ki, hazırda əhalinin sağlamlığı üçün risk az olsa da, vaksinlərə tələbat var.

Mütəxəssislər qış fəslində insanları ehtiyatlı olmağa çağırıb: “Bu fəsildə COVID-19, o cümlədən digər infeksiyalar arta bilər. Hazırda Şimal yarımkürəsində qrip, respirator sinsitial virus (RSV) və uşaqlıq pnevmoniyası kimi infeksiyalar müşahidə olunur. COVID-19-a səbəb olan virus isə zamanla dəyişir və bu, müxtəlif variantların yaranmasına gətirib çıxarır”.

ÜST hazırda “JN.1” də daxil olmaqla, digər “Omicron” variantlarını izlədiyini vurğulayıb. ABŞ Xəstəliklərə Nəzarət və Qarşısının Alınması Mərkəzlərinin məlumatına görə, “JN.1”  hazırda ölkədə ən sürətlə yayılan variantdır və infeksiyaların 15-29 faizini təşkil edir.

“Bu variantın koronavirus faktlarını, həmçinin digər virus və bakterial infeksiyaları artracağı proqnozlaşdırılır. Ona görə də, insanların çox olduğu və qapalı yerlərdə maska taxın; öskürərkən və asqıranda ağzınızı tutun; əllərinizi mütəmadi olaraq yuyun;  xüsusilə risk qrupundasınızsa, ən son koronavirus və qrip peyvəndi vurdurun, simptomlar varsa, testdən keçin”, - deyə qurumun məlumatında bildirilir.

Günay