“Sülh sazişi bu halda imzalana bilər” - ŞƏRH

“Bakı Ermənistanla sülh sazişinin tez imzalanmasında maraqlıdır”.

Sfera.az bildirir ki, bunu siyasi şərhçi Asif Nərimanlı deyib. Onun sözlərinə görə, bunun üç səbəbi var:

“Sərhədin delimitasiyası uzunmüddətli prosesdir, tərəflər arasında fikir ayrılığının olduğunu nəzərə alsaq, bu, sazişin imzalanmasını gecikdirəcək. Digər tərəfdən, Ermənistan “güzgü prinsipi” üzrə qoşunların geri çəkilməsini istəyir. Bu, sərhəddə strateji yüksəkliklərə nəzarəti bərpa edən Azərbaycanın xeyrinə olmadığı üçün məsələnin sonraya saxlanılması Bakının maraqlarına daha uyğundur. Ümumiyyətlə, Azərbaycan Ermənistanla münasibətlərin ikitərəfli formatda həll edilməsindən yanadır. Hərçənd, sərhədin müəyyən edilməsi sovet xəritələrini gündəmə gətirir və bu da xəritələrin olduğu Rusiyanın prosesdə iştirakını şərtləndirəcək”.

Ekspert bildirib ki,  İrəvan anklavlar məsələsinə görə də səhədin müəyyənləşməsinin ayrıca müzakirəsində maraqlı ola bilər:

“Burada bir mümkün variant da ola bilər. Tərəflər qarşılıqlı şəkildə ərazi bütövlüyünün tanınmasını rəsmiləşdirir, fikir ayrılığının olduğu məsələlər – sərhəd və kommunikasiyaların hansı prinsiplərlə müəyyən edilməsi sonraya saxlanılır. Bu halda kommunikasiyanın açılması arxa plana keçdiyi üçün itirən yenə Ermənistan olacaq”.

Türkan