“Hyundai” Rusiyadakı zavodunu satdığını elan etdi

“Hyundai” Rusiyadakı zavodunu satır.

Sfera.az bildirir ki, məşhur Koreya avtomobil istehsalçısı Rusiya Federasiyasındakı aktivlərinin alıcısına çevriləcək “Art-Finance” ilə danışıqlar apardığını elan edib.
 

“Hyundai Motor” Rusiya bazarında aktivlərin satışı planını təsdiqləyib.
 

“Hyundai”ın mətbuat xidməti qeyd edib ki, Rusiyada Hyundai avtomobil sahiblərinə dəstək məqsədilə satış sonrası və digər növ müştərilərə xidmət göstərməyə davam edəcək.
 

Qeyd edək ki, “Art-Finance” şirkəti artıq Rusiya bazarında Volkswagen aktivlərinin alıcısına çevrilib.
 

Xatırladaq ki, “Hyundai Motor” Cənubi Koreyada lider mövqeyə malik ən böyük avtomobil istehsalçısıdır və qlobal avtomobil sənayesində ən böyük şirkətlərdən biridir. Şirkət təkcə avtomobil istehsalında ixtisaslaşmayıb, həm də fəaliyyətini qatarların, hərbi texnikanın, sənaye avadanlıqlarının istehsalı və maliyyə xidmətlərinin göstərilməsi üzrə genişləndirir.
 

Şirkətin baş ofisi Seulda yerləşir. “Hyundai Motor” 2000-ci ildə yaradılmış Hyundai Motor Qrupunun bir hissəsidir. 2022-ci il üçün “Forbes Global”ə görə, şirkət dünyanın ən böyük ictimai şirkətləri arasında 147-ci yerdə qərarlaşıb.


Sankt-Peterburqdakı “Hyundai Motors” zavodu isə 2010-cu ildə istifadəyə verilmiş və ilkin olaraq ildə 200 min avtomobil istehsal etmək gücündə idi. Şirkət daha sonra “General Motors”a məxsus yaxınlıqdakı zavodu alıb. Bu, istehsal gücünü ildə 300 min ədədə qədər genişləndirməyə imkan verib.

Aynil
Sfera.az