Selin Dionun vəziyyəti getdikcə pisləşir
Sərt əzələ sindromundan (nevroloji pozğunluq) əziyyət çəkən 55 yaşlı kanadalı müğənni Selin Dionun vəziyyəti pisləşməkdə davam edir. 90-ların əfsanəvi pop ulduzu, artıq üz əzələlərini idarə edə bilmir.
Sfera.az bildirir ki, bu xəstəliyin müalicəsinin olmamasına baxmayaraq, Selin sağalıb yenidən səhnəyə qayıtmağı xəyal edir.
Sənətçinin vəziyyəti barədə jurnalistlərə böyük bacısı Klodet (Claudette) məlumat verib.
“Üzərində çox işləyir, amma əzələlərinə nəzarət edə bilmir. Ürəyimi parçalayan odur ki, o, həmişə nizam-intizamlı olub. Həmişə çox çalışıb. Anamız həmişə ona deyirdi: "Bir şeyi edəcəksə ən yaxşısını edəcək, ən düzünü edəcək” - deyə Klodet qeyd edib.
O əlavə edib ki, Selin ən çox pərəstişkarları üçün yenidən mahnı oxumağı xəyal edir:
"Düzdür, həm bizim, həm də onun xəyallarında məqsəd səhnəyə qayıtmaqdır. Amma nə dərəcədə? Bunu deyə bilmirəm. Səs telləri əzələdir, ürək də əzələdir. Məni məhv edən odur ki, bu, milyonda bir hadisə olduğuna görə, elm adamları bu sahədə çox araşdırma aparmayıblar. Çünki bu xəstəliyə çox az insanda rast gəlinir."
Qeyd edək ki, bir il əvvəl xəstəlik səbəbindən Dion dünya turnesini ləğv etmək məcburiyyətində qalıb. O vaxtdan bəri onun vəziyyətində geriləmə müşahidə olunur. Bu xəstəliklə bağlı araşdırmalar davam etsə də, irəliləyiş ləng gedir.
Oktyabr ayında bacısı Klodet müğənninin hələ əlil arabasından istifadə etmədiyini və hələ də öz performansını bərpa etməyi planlaşdırdığını bildirmişdi.
Onu da qeyd edək ki, sərt əzələ sindromundan əziyyət çəkən insanlar "heykələ" çevrilə bilər ki, bu da onların yeriməyi və danışmağını çətinləşdirir. Nevroloji pozğunluq bədənin öz sinir hüceyrələrinə “hücum etməsinə” səbəb olur və hərəkətliliyə ciddi təsir göstərir. Milyonda yalnız bir insana təsir etdiyi düşünülən bu vəziyyət, sümükləri qıra biləcək qədər şiddətli qıcolmalara da səbəb ola bilər.
Xəstələrə adətən 30-50 yaş arasında diaqnoz qoyulur və əsasən qadınlardır.
Selin Dion ilk dəfə 2022-ci ilin dekabrında İnstaqramda diaqnozunu açıqlayıb və bir az sonra 2023-cü ildə başlamalı olan dünya turunu ləğv etmişdi.
Dion hazırda Denverdə müalicə alır və səhnəyə qayıtmaq istədiyi üçün həkimlər tərəfindən hazırlanmış protokola səylə əməl edir.
Aysel
Sfera.az
