Azərbaycanda inək və qoyun sayı azalır - Ət qiymətləri bir qədər də yüksələcək 

2023-cü ildə Azərbaycanda qırmızı ətin bahalaşmasına səbəb olan inək və qoyun sayında azalma hələ də davam edir. 

Sfera.az rəsmi məlumatlara istinadən xəbər verir ki, 2023-cü ilin noyabrın 1-də ölkəmizdə inək və camış sayı 1,252 milyon başa düşüb. İnək və camış sayı ötən ilin oktyabrında olan sayla müqayisədə xeyli azdır. 2022-ci ilin oktyabrında 1,295 milyon baş inək və camış olub ki, bu da cari ildəki saydan 114 min baş çoxdur. 

İnək və camışlarla bərabər qoyun və keçilərin də sayı azalır. Rəqəmlərdəki dəyişiklik göstərir ki, qoyun və keçi sayında azalma daha sürətlə gedir. Belə ki, son bir ildə qoyun və keçi sayı 705 min baş azalaraq 7,223 milyon başa düşüb. 

Son bir ildə inək, camış, qoyun və keçi sayında azalmanın baş verməsi mal və qoyun ətinin bahalaşmasına səbəb olub. 

Ötən bir ildə mal ətinin bir kiloqramının qiyməti orta hesabla 13 manatdan 14,5 manata qədər yüksəlib. Eynilə qoyun ətinin qiyməti 13,8 manatdan 15,8 manata qədər artıb. 

Ölkəmiz özünü mal və qoyun əti ilə tam təmin edə bilmədiyindən ətin bir hissəsi xaricdən gətirilir. Amma quru sərhədlərin bağlı olması xaricdən ətlik diri heyvanların gətirilməsini çətinləşdirir. Belə olduqda bazarın qırmızı ətə olan tələbatının ödənilməsi üçün yerli heyvanlardan kəsim məqsədilə istifadə halları artır. Bu hal ölkəmizdə heyvan sayının azalmasına səbəb olur. 

Müşahidələr göstərir ki, quru sərhədlər bağlı qaldıqca ölkəmizdə inək və qoyun sayı azalacaq, nəticədə isə qırmızı ət qiymətləri yüksələcək. 

Vasif