“Rusiya müdaxilə edərsə, sülh danışıqlarında problemlər yaranacaq” - Politoloq  

Xəbər verdiyimiz kimi, 7 dekabr 2023-cü il tarixində Azərbaycan Prezidentinin Administrasiyası və Ermənistan Baş nazirinin Aparatı arasında aparılmış danışıqların nəticəsində humanizm prinsipləri rəhbər tutularaq Azərbaycan tərəfindən 32 erməni hərbçinin, Ermənistan tərəfindən 2 azərbaycanlı hərbçinin azad edilməsi barədə razılıq əldə olunub.

Həmin razılığa əsasən dünən əsirlərin mübadiləsi prosesi baş tutub.

Bəs, bundan sonra Azərbaycanla Ermənistan arasında hansı siyasi proseslər reallaşacaq?

Mövzu ilə bağlı Sfera.az-a danışan siyasi şərhçi Asif Nərimanlı bildirib ki, əsir mübadiləsinin aparılması  bundan sonrakı proseslərinin inkişafının ikiformatlı davam etdirilməsinə şərait yaradır:

“ Bu razılaşmanın həyata keçirilməsində beynəlxalq təşkilatların da rolu böyük idi. Hər iki ölkə iktitərəfli format çərçivəsində hərəkət etdiyi təqdirdə müəyyən nəticələr əldə ediləcək. Ermənistan Qərb platformalarında danışıqların aparılmasını istəyir. Bu isə Azərbaycanın maraqlarına uyğun gəlmir. Qranada görüşündə Ermənistanın gündəliyinin qəbul edilməsi Azərbaycanın gündəliyinə uyğun gəlmirdi. Bundan sonra rəsmi Bakı danışıqların ikitərəfli format çərçivəsində keçirilməsinə üstünlük verəcək”.

Ekspert bildirib ki, prosesə Rusiya müdaxilə edərsə, danışıqların aparılmasında çətinlik yaranacaq:

“İkitərəfli formatda danışıqların aparılması ilə sərhədlərin delimitasiya məsələsində ortaq mövqe tapıla bilər. Delimitasiya prosesi uzunmüddətli proses olduğuna görə sülh müqaviləsinin imzalanması uzadıla bilər”.

Ülkər