2023-cü ildə hansı məhsullara daha çox pul xərcləmişik? - STATİSTİKA
Azərbaycanda 2023-cü ildə yüksək inflyasiyanın olmasına baxmayaraq, əhalinin qeyri-ərzaq mallarına xərclədiyi pul nəzərəçarpacaq dərəcədə artıb.
Sfera.az xəbər verir ki, son bir ildə əhalinin qeyri-ərzaq mallarına xərclədiyi pul 2,84 milyard manatdan (14,4 faiz) çox artıb. Ötən ilin 11 ayında qeyri-ərzaq mallarına 19,76 milyard manat xərcləndiyi halda bu ilin eyni dövründə 22,6 milyard manat xərclənib.
İnflyasiya amili nəzərə alınmasa əhalinin bu xərclərində 3,8 faiz artım olub. Müqayisə üçün bildirək ki, ərzaq xərclərindəki real artım 2,5 faiz təşkil edib.
Yüksək bahalaşmaya baxmayaraq, əhalinin qeyri-ərzaq mallarına çəkdiyi xərcin belə sürətlə artması geyim, avtomobil yanacağı, həmçinin informasiya kommunikasiya avadanlıqlarının alışına çəkilən xərcin kəskin artması ilə bağlıdır.
Bu il əhali geyim və toxuculuq məhsullarına 7,54 milyard manat xərcləyib. On bir ay ərzində geyimə və toxuculuq məhsullarının alışına ayrılan pul 888 milyon manat, yaxud real müqayisədə 5,4 faiz artıb.
Avtomobil yanacağına çəkilən xərcdəki real artım 8 faiz olub. Ötən il yanacağa 2,53 milyard manat xərcləyən avtomobil sahibləri bu il 2,8 milyard manatdan çox pul xərcləyib.
İnformasiya kommunikasiya avadanlıqlarına xərclənən pul isə real qiymətlərlə, yəni inflyasiya nəzərə alınmadan 21,4 faiz artıb. Bu il adıçəkilən mal qrupunda xərclər təxminən 100 milyon manat artaraq 543 milyon manata çatıb.
Əhalinin qeyri-ərzaq mallarına çəkilən xərcdə sürətli artıma məişət avadanlıqları və mebelin alışına ayrılan pulun da kəskin artması köməklik edib. Bu il ərzində elektrik avadanlıqları və mebellərin alışına xərclənən vəsait 250 milyon manatdan çox, yaxud real qiymətlərlə 4,1 faiz artaraq 2,5 milyard manata çatıb.
Ümumilikdə, əhalinin qeyri-ərzaq mallarına xərclədiyi pulun sürətlə artmasına istehlak kreditlərinin həcminin artması, avtomobillərdən daha çox istifadə edilməsi kimi amillərin güclü təsiri olib.
Vasif
