Fransanın Qordes kəndi haqlı olaraq dünyanın ən gözəl kəndlərindən biri hesab olunur.

Sanki bu yaşayış məntəqəsi uçurumun kənarında “asılıb” qalıb və hər an uça bilər. Bununla belə, ekspertlər əmin edirlər ki, narahat olmaq üçün heç bir əsas yoxdur.
 

Sfera.az bildirir ki, Qordes kəndi Provansdakı Vokluz yaylasından 340 metr yüksəklikdə yerləşir. Bu inanılmaz gözəl ərazi rahat daş evləri, gözəl mənzərələri, badam və sərv ağacları ilə məşhurdur.
 

Kənd, bir vaxtlar Kelt Mühafizəçiləri qəbiləsinin qalası, sonra İkinci Dünya Müharibəsi zamanı müqavimət hərəkatının əsas bölgələrindən biri olub. XX əsrin ikinci yarısında isə kənd sənət mərkəzinə çevrildi. Məşhur rəssamlar, xüsusən də Mark Şaqall, Viktor Vasareli və Pol Mara buraya gəlməyi xoşlayırdılar.


Burada maraqlı muzeylər fəaliyyət göstərir, mütəmadi olaraq sərgilər təşkil olunur. Kənddə hər zövqə uyğun təzə və konservləşdirilmiş qidalar, parça və ağacdan hazırlanmış əl işləri, suvenirlər və geyimlər ala biləcəyiniz yüzlərlə köşk var.
 

Ancaq ən məşhur görməli yer vadinin heyrətamiz panoramik mənzərələrini təqdim edən “Château de Gordes” kimi tanınan Qordes orta əsr qalasıdır.
 

Tur bələdçiləri turistlərə sehrli dolama küçələrdə gəzməyi və 18-ci əsrdə tikilmiş rəngli freskaları olan qədim kilsə olan “L'Eglise Saint Fermin”i də ziyarət etməyi məsləhət görürlər. Kilsə kəndin hamisi müqəddəs Firmin şərəfinə adlandırılıb.


Səyahətçilərin görməli olduğu başqa bir yer isə açıq səma altında yerləşən Village des Bories muzeyidir. Burada vaxtilə çobanların yaşadığı ənənəvi daş daxmaları görə bilərsiniz.

Aynil

Sfera.az