Noyabrda əksər ərzaq malları ucuzlaşıb – Daha çox ucuzlaşma bu məhsullarda olub

Noyabrda oktyabr ayı ilə müqayisədə ərzaq mallarında 0,4 faiz ucuzlaşma qeydə alınıb. Ərzaq mallarının ucuzlaşması əsasən heyvan mənşəli məhsullarda və meyvələrdə müşahidə olunub.

Sfera.az rəsmi məlumatlara istinadən xəbər verir ki, noyabrda ət və ət məhsullarının qiymətləri orta hesabla 1,1 faiz enib. Bir ay ərzində mal, qoyun və toyuq ətinin qiymətində azalma baş verib.

Balıq və balıq məhsulları da 0,9 faizə yaxın ucuzlaşıb. Xüsusən təzə balıqların qiymətində enmə daha çox olub.

Digər heyvan mənşəli məhsullardan süd və süd məhsullarının qiyməti 0,2 faiz artıb.

Yumurtanın dəyəri isə təxminən 1,9 faiz yüksəlib.

Ötən ay bitki mənşəli yağların qiymətində də enmə baş verib. Günəbaxan və qarğıdalı yağlarının qiymətində enmə nəzərəçarpan olub.

Ciddi qiymət enməsi meyvələrdə də müşahidə edilib. Meyvələrdən naringinin, portağalın, limonun, almanın, heyvanın, narın, xurmanın, kivinin dəyəri enib.

Əsas ərzaq mallarının ucuzlaşması ümumilikdə qida mallarının dəyərinin düşməsinə imkan yaradıb.

Vasif