“Mən 16 yaşında deyiləm” - Adriana Lima ona gülənlərə cavab verdi
42 yaşlı braziliyalı supermodel Adriana Lima görünüşünə görə tənqidlərə münasibət bildirib.
Sfera.az bildirir ki, bu barədə Lima "Harper's Bazaar Arabia"ya müsahibəsində açıqlama verib.
Keçmiş “Victoria's Secret” mələyi 2024-cü ildə onu modellik sənayesinə qayıdışın, reklam müqavilələrinin və podiumların gözlədiyini bildirib.
"Mənə elə gəlir ki, hər supermodelin bir geri dönüşü var. Son vaxtlar mən tez-tez təkcə 2000-ci illərin deyil, 80-90-cı illərin modellərini də görürəm və məncə, bu, gözəldir" - deyə braziliyalı məşhur bildirib.
Qeyd edək ki, Adriana Limanın üç övladı var. Bundan əlavə, Lima 14 yaşlı qızı Valentinadan da danışıb. Məlum olub ki, Limanın qızı da modellik sənayesində karyera qurmaq istəyir.
Adriana görünüşü ilə bağlı tənqidlərə də cavab verib. Tədbirlərdən birində göründükdən sonra onun üzündəki dəyişikliklər müzakirə mövzusuna çevrilmişdi. Adriana bildirib ki, ona qarşı kin qusanların tənqidinə əhəmiyyət vermir. Ulduz qeyd edib ki, vaxtının çox hissəsini övladlarını böyütməyə həsr edən istənilən çoxuşaqlı ana belə görünür.
"Məsələ burasındadır ki, mənim 16 yaşım yoxdur. Bu yaşda modelliyə başlamışam, amma bir daha 16 yaşında olmayacağam. 42 yaşım var və indiyə qədər yaşadığım ən xoşbəxt dövrümdəyəm. Özümlə çox xoşbəxtəm. Yaşımı qəbul edirəm və heç kim üçün dəyişmək fikrim yoxdur, heç vaxt da dəyişməyəcəyəm" - deyə braziliyalı supermodel bildirib.
Aynil
Sfera.az
