"Məktəblərdə qızılcaya yoluxma ilə bağlı distant təhsilə..." - Nazirlikdən MÜHÜM AÇIQLAMA
Son günlər məktəblərdə qızılcaya yoluxma artır, hətta ölüm halları da qeydə alınır.
Qızılca xəstəliyi ilə bağlı məktəblərdə tədbirlər görülürmü? Məktəblərin distant təhsilə keçməsi gözlənilirmi?
Məsələ barədə Sfera.az-a açıqlamasında Məktəbəqədər və Ümumi Təhsil üzrə Dövlət Agentliyinin ictimaiyyətlə əlaqələr şöbəsindən Zenfira Sevdimalı bildirib ki, təhsil müəssisələrində nəzarət gücləndirilib:
“Son günlər uşaqlar arasında qızılcaya yoluxma halları ilə bağlı məsələ Məktəbəqədər və Ümumi Təhsil üzrə Dövlət Agentliyinin də nəzarətindədir.Məktəblərdə qızılca xəstəliyinə yoluxma halları ilə bağlı quruma daxil olan məlumat əsasında nəzarət tədbirləri gücləndirilib, müvafiq ixtisaslaşdırılmış qurumlar tərəfindən dezinfeksiya işləri həyata keçirilir.
Bununla yanaşı, ümumi təhsil məktəblərində pedaqoji kollektivə şagirdlərin səhhətində müşahidə oluna biləcək hər hansı narahatlıq halları ilə bağlı daha diqqətli olmaları tapşırılıb.
Nazirlik rəsmisi valideynlərə də müraciət etdi:
"Mövsümi xəstəliklərə və virus infeksiyalarına yoluxmanın qarşısının alınması məqsədilə övladlarınıza peyvənd vurdurmağınızı və tam sağalanadək onların digər uşaqlarla yaxın təmasda olmamasını təmin etməyi tövsiyə edirik”.
Z.Sevdimalı qeyd etdi ki, 195 nömrəli məktəb istisna olmaqla, distant təhsilə keçilməsi ilə bağlı qərar yoxdur:
“Yoluxma halları kütləvi xarakter daşıyarsa, epidemiya təhlükəsinin yaranacağı halda məktəblərin distant təhsilə keçməsi qərarı aidiyyəti qurumlarla birgə verilə bilər”.
Firuzə Əliyeva
