“Rəsmi Bakı Ermənistanla Azərbaycan arasında sülh müqaviləsi ilə bağlı erməni tərəfinin son təkliflərinə hələ ki, cavab verməyib”.

Bunu Ermənistanın xarici işlər nazirinin müavini Mnatsakan Səfəryan deyib.

“Cavab aldıqda ictimaiyyətə məlumat verəcəyik”, - o bildirib.

Bununla bağlı Sfera.az-a açıqlama verən politoloq Məhəmməd Əsədullazadə deyib ki, sözügedən açıqlama manipulyasiya siyasətinin bariz nümunəsidir:

“Ermənistanın təklifləri sülh müqaviləsindən yayınmağa hesablanıb və məqsəd Azərbaycana qarşı beynəlxalq təzyiqləri artırmaqdır. Avropa İttifaqı və Vaşinqtona arxalanan Nikol Paşinyan Azərbaycanla bərabər şəkildə sülh müqaviləsinin bağlanmasında maraqlıdır. Ermənistan təklif edir ki, anklavlar məsələsi barter şəklində həll edilsin; Azərbaycan Zəngəzur dəhlizinin açılmasını gündəliyə daşımasın; Ermənistan “Sülh qovşağı” planının iştirakçısı olsun”.

Ekspert əlavə edib ki, ABŞ dövlət katibinin köməkçisi Ceyms Obrayn Azərbaycana səfər edərək sülh müqaviləsinin detallarını müzakirə edəcək: “ABŞ diplomatı Azərbaycana Ermənistanın vəkili kimi gələcək”.

Xatırladaq ki, noyabrın 21-də İrəvan Bakıya Ermənistanla Azərbaycan arasında sülh müqaviləsi bağlamaq üçün altıncı təklifini göndərib.

Türkan