Ölkəmizdə müəyyən maneələri aşmaqla dövlət qulluğunda müəyyən vəzifələrdə çalışmaq mümkündür. Bunun üçün dövlət qulluğunun qəbul imtahanın test, daha sonra müsahibə mərhələsini keçməlisən. Lakin iş bununla bitmir.

Namizədlərin qarşılaşdığı ən böyük problem vakant yerlərinin sayının azlığıdır. Dövlət orqanlarında işləmək istəyənlər çox, təklif edilən vəzifələrin sayı isə azdır. Nəticədə, xeyli namizəd dövlət qulluqçusu olmaq arzusunu reallaşdıra bilmir. Amma dövlət orqanlarında belə vəzifələrdə müddətli müqavilə ilə işləyən kifayət qədər kadr var.

Mövzu ilə bağlı Sfera.az-a danışan təhsil eksperti Kamran Əsədov bildirib ki, ölkədə təhsil almış şəxslərin yalnız 42 faizi öz ixtisası üzrə işləyir. Son 3 ildə dövlət qulluğuna müraciətlərin sayında azalma müşahidə olunur. Əsas səbəb isə ikinci mərhələyə, yəni müsahibə mərhələsinə edilən müdaxilələlərdir. Digər nüans isə təyinat məsələsidir. Test və müsahibə mərhələsindən keçənlərin 23 faizi işə qəbul olunur. Dövlət qulluğuna qəbul zamanı əsassız tələblər də olur”.

Ekspertin fikrincə, dövlət qulluğuna qəbulun daha da şəffaflaşdırılması üçün bütün səlahiyyətlər Dövlət İmtahan Mərkəzinə həvalə edilməlidir. Eyni zamanda beynəlxalq təcrübədən istifadə olunmalıdır.

Ülkər Abdurahmanlı