Braziliyalı Norma Silveira da Silva "dirildildikdən" sonra dünya manşetlərinin gündəminə çevrilib. Bu dəhşətli hadisənin necə baş vermə ehtimalı isə Tibbi Etika Komitəsi tərəfindən araşdırılır.


Sfera.az bildirir ki, San Jose Xəstəxanasının həkimləri noyabrın 25-də 90 yaşlı qadının infeksiyadan öldüyünü təsdiqləyiblər. Bundan sonra qadının cəsədi krematoriyaya aparılıb. Burada işçilərdən biri təsadüfən onun sağ olduğunu görüb. Qadın hələ isti olub və çətinliklə də olsa nəfəs alıb.

Qadının yenidən xəstəxanaya çatdırıldığı, lakin təəssüf ki, bir neçə saat sonra dünyasını dəyişdiyi bildirilir. İndi hüquq-mühafizə orqanları bu dəhşətli səhvin necə baş verə biləcəyini müəyyənləşdirir.


Mərhumun baxıcısı Silvi Pereira deyir: "Bu, öz işinə məsuliyyətsiz yanaşma və etinasızlıqdır. Bunu heç kimə arzulamazdım. Əlbəttə, biz məhkəməyə verəcəyik".
 

O əlavə edir ki, Normanın cəsədi xəstəxanadan krematoriyaya o qədər tez aparılıb ki, ailə üzvləri onu görüb vidalaşmağa vaxt tapmayıb. Xoşbəxtlikdən, krematoriya işçisi onun sağ olduğunu görüb.


Braziliyanın Tibbi Etika Komitəsi dəhşətli işin təhqiqatına başlayıb. Santa Catarina əyalətinin regional tibb şurasının rəsmiləri işə nəzarət etmək üçün bütün lazımi prosedurlardan istifadə edəcəklərini bildiriblər.


Qadının ikinci ölüm şəhadətnaməsində onun septik şokdan öldüyü bildirilir.

Qadının cəsədi bazar ertəsi, noyabrın 27-də kremasiya edilib.

Yeri gəlmişkən, bu, ilk belə hekayə deyil. Ekvadorda da xəstəxanada öldüyü bildirilən 76 yaşlı qadın öz dəfn mərasimi zamanı dirilmişdi. Hadisə şahidləri deyirlər ki, “mərhum qadın” tabutun içini döyəcləməyə başlayıb. Həkimlər xəstənin daimi monitorinq altında olduğunu qeyd etsə də, hadisə ilə bağlı əlavə məlumat verməyib.

Aynil

Sfera.az