Əcnəbilər yaşayan hosteldə yanğın - 13 nəfər öldü

Qazaxıstanın keçmiş paytaxtı Almatıda hostellərdən birində yanğın baş verib, nəticədə 10-dan çox adam ölüb.

Sfera.az bildirir ki, bu barədə Almatı şəhər Fövqəladə Hallar İdarəsi məlumat yayıb.

Yerli hakimiyyət orqanlarının məlumatına görə, hostel yaşayış binasının zirzəmisində qurulub. Sahiblərinin buranı açmaq üçün icazəsi olmayıb. Ölənlərin dəm qazından zəhərləndiyi ehtimal edilir. Əvvəllər bura üç mərtəbəli evin zirzəmisi olub və hostel yeni açılıb.

Yanğın səhər tezdən baş verib. Xilasedicilərin bildirdiyinə görə, yanğın zirzəminin dəhlizində olub.

"Yanğının söndürülməsi zamanı ilkin olaraq 13 cəsəd aşkarlanıb, onların şəxsiyyəti müəyyənləşdirilir. Hamısı dəm qazından zəhərlənərək ölüblər" - Almatı Fövqəladə Hallar Departamentinin açıqlamasında bildirilir.


İlkin məlumatlara görə, yataqxanada 72 nəfər olsa da, onlardan 59-u özləri çölə çıxaraq həyatını xilas edə bilib. Üç nəfər xəstəxanaya çatdırılıb, həkimlər onlara lazımi köməklik göstərirlər. Yanan binanın qalan sakinləri yaxınlıqdakı məktəbə yerləşdirilib.
 

Yanğının söndürülməsinə 46 nəfər canlı qüvvə və 13 texnika cəlb olunub. Yanğının dəqiq nədən baş verməsi hələlik məlum deyil, istintaq aparıılır.
 

Almatı meri Aidar Jakybayev hosteldə əsasən tələbələrin yaşadığını bildirib. Onların bəziləri tibb universitetinin tələbələri olub, əksəriyyəti Pakistandan Qazaxıstana gəlib.


Almatı şəhərinin fövqəladə hallar departamentinin rəhbəri Nurlan Atıqayev də qeyd edib ki, hostel cəmi 1,5 aydır fəaliyyət göstərir. Açılan zaman icazəsi olmayıb. Onun sözlərinə görə, zirzəminin təyinatı olmadan dəyişdirilməsi qadağandır.

Aysel

Sfera.az