Ölkədə kəskin respirator infeksiyalara yoluxanların sayı artıb. Hər il payız aylarında belə viruslara yoluxma halları çıxalır.

Bəs, çoxalmanın qarşısını almaq üçün nə etməliyik?

Mövzu ilə bağlı sfera.az-a danışan Səhiyyə Nazirliyinin eksperti, infeksionist Təyyar Eyvazov bildirib ki, soyuq havalarda respirator infeksiyalara, qripə yoluxma hallarında artım müşahidə olunur:

"Respirator virus infeksiyaları hava-damcı üsulu ilə yayılır. Soyuq havalarda insanların daha çox qapalı məkanlarda toplanması, yaxın təmasların artması, otaqların daha az havalandırılması, dəyişkən hava şəraitində düzgün olmayan geyim seçimi, soyuq havanın təsirindən yuxarı tənəəffüs yollarının infeksiyalara müqavimətinin azalması, immunitetin fəsli olaraq zəifləməsi və digər səbəbləri var. Hər il eyni hal müşahidə edilir, virusların növləri dəyişilir. Müalicə üsulları əksər hallarda eynidir, simptomlara əsaslanır, yalnız qrip və koronavirusa qarşı antiviral preparatlar məlumdur və infeksiya təsdiqləndikdə istifadə oluna bilər".

İnfeksionist bu xəstəliyə yoluxanlara təmiz hava və bol maye qəbulunu tövsiyə edib.

Onun sözlərinə görə, respirator xəstəliklərin inkubasiya dövrü 3-5 gün olur:

“Əgər xəstəlik həmin dövrdən artıq davam edərsə və simptomları çoxalarsa bu ağırlaşma hesab olunur. Ağırlaşma halları baş verərsə mütləq həkimə müraciət olunmalıdır”.

Ülkər Abdurahmanlı