“İşə düzəlmək üçün heç kimə pul verməyin”.

Bunu Sfera.az-a açıqlamasında vəkil Vamiq Şükürov deyib. O qeyd edib ki, işə düzəltmə adı ilə insanları aldadıb pullarını mənimsəmək geniş yayılmış dələduzluq hallarından biridir:

“Belə dələduzlar adətən bahalı avtomobillərdən istifadə edirlər, çox vaxt sürücüləri olur, bahalı paltarlar geyinir, məşhur restoranlarda otururlar. Ətrafında olan insanlara özünü problemli işləri həll edən, adamları yaxşı vəzifələrə işə düzəldən və yuxarılara əli çatan şəxs kimi tanıdırlar. Məhz bu səbəbdən ətrafında olan şəxslər özləri onu axtarıb tapır və işə düzəltməkdə kömək etmələrini xahiş edirlər. Beləcə, dələduz insanları öz qarmağına keçirə bilir”.

Vəkil bildirib ki, belə dələduzlar külli miqdarda pul aldıqdan sonra aylarla görünmürlər:

“Həmin adam elə bir abu-hava yaradır ki, guya “yuxarılar” işi düzəltməklə məşğuldurlar. Əslində isə heç bir iş getmir, dələduz aldığı pulu çoxdan yeyib qurtarıb. Ona görə də heç vaxt işə düzəlmək üçün heç kimə pul verməyin”.

Günay