Gəlin-qayınana münasibətlərinin pis olmasının günahkarı kimdir? - PSİXOLOQ AÇIQLADI

Aktual problemlərindən biri də gəlin-qayınana münasibətləridir. Gəlin-qayınana münasibətlərindəki gərginlik ailələrin dağılmasına qədər gətirib çıxara bilir.

Bəs, problemin kökündə nə dayanır və bu münasibətləri necə tənzimləmək olar?

Mövzu ilə bağlı Sfera.az-a danışan psixoloq Gülnar Orucova bildirib ki, yaxın keçmişlə müqayisədə indi qayınanalar daha humanist və anlayışlıdırlar: 

"Buna baxmayaraq, gəlin-qayınana arasında mübahisələrin sayı da az deyil. Bunun əsas səbəbi qayınanaların məsləhətinin və tövsiyəsinin gəlinlər tərəfindən yalnış anlaşılmasıdır. Gəlinlər işlərinə qarşılmağını istəmirlər və qayınanaların onlara hər hansı iş tapşırmasına qəzəblənirlər. Bu aqressiya isə iki tərəf arasında münasibətlərin korlanmasına səbəb olur”.

Psixoloq bildirib ki, qayınana və qayınataların etdiyi ən böyük səhv  verdikləri vədləri yerinə yetirməmələridir.

“Ana övladının xoşbəxtliyinə çalışmalıdır. Lakin qaynanalar övladının ailəsini idarə etməyə çalışırlar. Bu düzgün deyil. Çünki həmin cütlük öz ailə və məişət problemləri ilə bağlı özləri qərar verməlidirlər. Həmin cütlüyün ev işlərinə, ailədaxilə münasibətlərinə qarışmaq qayınanın etdiyi ciddi səhvlərdən biridir. Oğullarının etiraz etməməsinə baxmayaraq, qayınanalar gəlinlərinin geyiminə müdaxilə edirlər. Bu da gəlinin ona qarşı aqressiv olmasına gətirib çıxarır”.

Psixoloq son olaraq əlavə edib ki, belə hallarda oğul anası və yoldaşı arasında sərhəd qoymalı və hər ikisini anlayaraq vəziyyəti yumşaltmağa çalışmalıdır.

Ülkər Abdurahmanlı