“Rayonlarda vətəndaşlar investisiya dələduzluğunun qurbanı olublar”.

Sfera.az bildirir ki, bunu texnobloqqer Fərid Pərdəşünas deyib. O, sözügedən hadisəni bu cür təsvir edib:

“Kəndli ilk olaraq ona müraciət edən brokerə 60 manat yatırım edib, daha sonra 120 manat qazanıb və nağdlaşdırıb.  Ardınca 200 manat qoymaq tələb olunub və 300 manat götürülüb. Növbəti mərhələdə 5000 manat tələb edilib. Vətəndaş tələb olunan məbləği qoyub və hesabında həmin məbləğ 9000-ə qədər artıb. Lakin məbləği nağdlaşdırmaq olmayıb.  Bu dəfə broker yanlışlıq etdiyi üçün hesabının bloklandığını və açılması üçün daha 9000 manata ehtiyac olduğunu bildirib. Vətəndaş qohumdan, dostdan borc tapıb, vəsaiti qoyub və bir daha əlaqədər şəxslə kommunikasiya qura bilməyib”.

F.Pərdəşünasın sözlərinə görə, bütün əməliyyatlar “Telegram” üzərindən aparılıb: “Tranzit m10 elektron pulqabısı hesablarından istifadə olunub və sonda vəsait ölkədən çıxarılıb”.

Bununla bağlı “m10”dan da açıqlama gəlib. “Hazırda bu tip hesablarla bağlı lazımi tədbirlər görülür. Sosial şəbəkə hesablarımızda tez-tez bu istiqamətdə videoçarxlar təqdim edirik. Çalışırıq ki, hər kəsi belə şəbəkələrdən qoruyaq. Müştərilərimiz də belə hesablar barədə bizə məlumat təqdim etsələr, operativ şəkildə hər bir müraciəti yoxlamağa hazırıq”.

Günay