Ankara İsveçin NATO üzvlüyünü təsdiqləyəcək: “İlin sonuna qədər...”

“Rəsmi Ankara ilin sonuna qədər İsveçin NATO-ya üzvlüyünü təsdiq edəcək”.

Bunu Türkiyə Böyük Millət Məclisindəki mənbə  Rusiya KİV-nə açıqlamasında deyib.

Bununla bağlı Sfera.az-a açıqlama verən siyasi şərhçi Kənan Novruzov bildirib ki, Türkiyə İsveçin alyansa üzvlüyünü təsdiqləməyə tələsmir və bunun konkret səbəbləri var:

“Onlardan biri Stokholmun terrorçuları dəstəkləməsidir. İkincisi, Türkiyənin Avropa İttifaqına üzvlüyünə məqsədli şəkildə əngəl yaradılır. Bundan başqa, NATO-nun genişlənməsi Rusiyanın strateji maraqlarına ziddir. Ukraynada müharibənin başlanmasının səbəbi də məhz bu idi. Ankara NATO ilə nə qədər yaxındırsa, Moskva ilə də bir o qədər yaxındır. Türkiyə ilə Rusiya arasında çox yaxşı, qarşılıqlı maraqlara xidmət edən əlaqələr var. Bu, şəxsən liderlər səviyyəsindədir. Odur ki, Ankara NATO-ya görə Moskva ilə münasibətləri qurban vermək istəmir”.

Müsahibimiz qeyd edib ki, Türkiyənin İsveçə üzvlüyünü təsdiqləməsi Rusiya ilə münasibətlərə təsir edə bilər:

“Eyni zamanda NATO qarşısında elə şərtlər qoyula bilər ki, Moskva da alyansın genişlənməsinə razı olsun. Məsələn, bu, Ukrayna və Gürcüstanla bağlı Rusiyanın maraqlarına uyğun hansısa ssenarinin reallaşması ola bilər. Düşünürəm ki, Stokholmun NATO- ya üzvlüyü artıq siyasi alış-veriş məsələsinə çevrilib”.

Günay