Rusiya Ukrayna ilə danışıqlara başlayır? - İDDİA

“Rusiya vaxt qazanmaq üçün Ukrayna ilə danışıqlara başlaya bilər”.

Bunu ABŞ-nin Müharibə Araşdırmaları İnstitutu iddia edib. Bildirilib ki, gələcək hücum əməliyyatları üçün vaxt qazanmaq istisna olmaqla, Kremlin Kiyevlə sülh danışıqlarına başlamaq ehtimalı azdır.

Bununla bağlı Sfera.az-a açıqlama verən siyasi şərhçi Kənan Novruzov deyib ki, hazırda həm Moskva, həm də Kiyev danışıqlar barədə düşünə bilər, amma bu mümkünsüzdür:

“Çünki Qərb dəstəyi müəyyən mənada azaltsa belə, yenə də Ukraynanı silahlandırır. ABŞ və müttəfiqləri savaşın davam etməsində maraqlıdır. Ukrayna ABŞ-nin iradəsinə zidd olaraq danışıqlara başlasa, bu, onun üçün fəlakət olar. Bu halda Vaşinqton Ukraynaya dəstəyi dayandıracaq. Nə qədər ki, Qərb Ukraynanı silahlandırır, Kiyev döyüşməyə məcburdur. Bu isə Moskva tərəfdən də danışıqları istisna edir”.

Ekspert bildirib ki, yaxın zamanda sülhün əldə olunması inandırıcı görünmür:

“Rusiya bunu istəyə bilər, amma ABŞ imkan verməz. Rusiya danışıqlara cəhd etsə, yəqin ki, Qərb təzyiqləri daha da artacaq.  Bəlkə də, haçansa Ukraynadakı müharibə dondurulacaq. Amma bu, yaxın gələcək üçün ağlabatan görünmür”.

Günay