"Nəcməddin Sadıkovun həbs olunmaması şəhidin ruhuna təhqirdir" - Deputatdan SƏRT AÇIQLAMA

Müdafiə Nazirliyində 143 milyonluq mənimsəmə faktı ilə bağlı məhkəmə araşdırmaları davam edir. Bununla bağlı Azərbaycan Ordusunun sabiq Baş Qərargah rəisi general-polkovnik Nəcməddin Sadıkov və başqa bir neçə nəfər haqqında da icraat ayrılıb. Hüquqşünaslar da bildirir ki, N.Sadıkov haqqında Azərbaycan Respublikasının Cinayət Məcəlləsinin mənimsəmə maddəsinə görə, 10-14 il müddətində həbs cəzası nəzərdə tutulur.

Mövzu ilə bağlı Sfera.az-a açıqlamasında deputat Fazil Mustafa bildirib ki, dövlətin vəsaitini mənimsəyənlər mütləq məsuliyyətə cəlb olunmalıdır:

“Hesab edirəm ki, Müdafiə Nazirliyində hətta 10 manatlıq yeyinti belə Azərbaycan əsgərinə, zabitinə, qazisinə və şəhidinə, onların ruhuna olan bir təhqirdir. Ona görə də bu məsələnin üzərinə ciddi gedilməlidir, kimin günahı varsa, məsuliyyətə cəlb olunmalıdır və bu sektorda məsuliyyətdən kənar adam qalmamalıdır. Bunun hansısa şəkildə məsuliyyətini daşıyanlar başa düşməlidir ki,  onun əvəzinə kimsə gedir döyüşür, şəhid olur, onların ailəsi faciəvi vəziyyətdə qalır. Bunlar isə Bakıda oturub xımır-xımır vəsaiti mənimsəyirlər. Bu burunlarından bir gün mütləq gəlməlidir və əminəm ki, gələcək də. Bu mövzuda heç kimə güzəşt olunmamalıdır, bu işi görənlər məsuliyyətə cəlb olunmalıdır”.

Firuzə Əliyeva