“Gürcüstan regionda lider rolunu öz üzərinə götürmək istəyir”.

Sfera.az bildirir ki, bunu Gürcüstan Parlamentinin Xarici Əlaqələr Komitəsinin sədri Nikoloz Samxaradze deyib. O, qeyd edib ki, Tiflisin İrəvanla Bakı arasında münasibətləri normallaşdırmaq səylərini də məhz bu şərtləndirir.

“Gürcüstan üçün “3+3” formatı qəbuledilməzdir, bizim mövqeyimiz çox qətidir. Rusiya ərazi bütövlüyümüzü tanımayana qədər biz bu formatda iştirak etməyəcəyik. Amma bu o demək deyil ki, Tiflis Cənubi Qafqazdakı proseslərdən kənarda qalacaq. Biz Türkiyə ilə ikitərəfli münasibətləri inkişaf etdirmək üzərində işləməkdə davam edirik və üçtərəfli Gürcüstan-Ermənistan-Azərbaycan formatını formalaşdırmağa çalışırıq”, - deyə Samxaradze bildirib.

O, əlavə edib ki, Tiflis daha böyük sülh haqqında sazişin imzalanacağı yerə çevrilməyə çalışır.

Xatırladaq ki, oktyabrın 23-də Tehranda keçirilən görüşdən sonra Ermənistan, Rusiya, İran, Türkiyə və Azərbaycan xarici işlər nazirləri 9 bənddən ibarət bəyanat qəbul ediblər. Onlardan birində mübahisələrin sülh yolu ilə həllinin, siyasi müstəqilliyin, ərazi bütövlüyünün təmin edilməsinin vacibliyi,  beynəlxalq səviyyədə tanınmış sərhədlərin toxunulmazlığı, daxili işlərə qarışmamaq, insan hüquqlarına hörmət vurğulanıb. Öz növbəsində, Gürcüstan da Qarabağda 44 günlük müharibədən bəri dəfələrlə İrəvanla Bakı arasında münasibətlərin tənzimlənməsi üçün platforma təklif edib.

Günay