“Dünyanın ayrı-ayrı beynəlxalq gücləri Cənubi Qafqaz regionuna “yağlı tikə” kimi baxırlar”.

Bunu Sfera.az-a açıqlamasında siyasi şərhçi Kənan Novruzov deyib. Onun sözlərinə görə, Fransa, ABŞ kimi regiondan çox uzaq dövlətlər bölgə ilə bağlı maraqlarını həyata keçirmək məqsədilə hərbi gərginliyə şərait yaradırlar:

“Bu dövlətlər çirkin məqsədləri üçün daha çox regionun “ən zəif bəndi” olan Ermənistandan istifadə edirlər. Region ölkələri məhz qarşılıqlı əməkdaşlıq, həmrəylik nəticəsində kənar güclərin bölgəyə müdaxiləsinin qarşısını ala bilərlər. Bu isə regionda “suların durulması” deməkdir. Cənubi Qafqazda əməkdaşlığın güclənməsi, xarici güclərin regiona müdaxiləsinin qarşısının alınması üçün ən ideal variant məhz 3+3 layihəsidir. Altılıq platformasının güclənməsi istiqamətində müəyyən addımlar atılsa da, təəssüf ki, hələ də arzuolunan nəticəni əldə etməmişik. Bunun əsas səbəbi Gürcüstanla Rusiya arasındakı problemlərdir”.

Ekspert əlavə edib ki, altılıq platformasının güclənməsi region ölkələrinin hər birinin xeyrinə olmaqla yanaşı, həm də ümumi bölgə üçün faydalıdır:

“Əslində 3+3 formatının inkişafı qlobal sülhə də töhfə verə bilər. Çünki bunun nəticəsində ayrı-ayrı siyasi aktorlar arasında qarşıdurma xeyli dərəcədə səngiyəcək.  Kənar güclərin regiona soxulmasının qarşısının alınması Cənubi Qafqaz ölkələrinin marağındadır. Bunun yeganə yolu isə ortaq mövqedən çıxış edərək, əməkdaşlığı gücləndirməkdir. Bu zaman bizim heç bir kənar oyunçuya ehtiyacımız olmaz. Nəticədə üçüncü güclərin regiona soxulmasının qarşısı alınar”.

Günay