İsrailin baş naziri Binyamin Netanyahunun böyük oğlu Yair Netanyahunun ABŞ-da qalması və ölkəsinə dönə bilməməsi hərbçilərin reaksiyasına səbəb olub.

Sfera.az bildirir ki, İsrail mediasının iddialarına görə, müxtəlif yerlərdə yaşayan israillilər ölkələrinə qayıdıb, bəziləri təhsilini, bəziləri isə işlərini yarımçıq saxlayıb. Bu baxımdan hələ də ABŞ-də olan Yair Netanyahu hədəf obyekti olub. “Yair bu ilin əvvəlində ABŞ-yə köçüb və orada yaşamağa davam edir”, deyə yerli mətbuatda vurğulanıb.

İngiltərənin "The Times" qəzetinə danışan, İsrailin şimal cəbhəsində könüllü olaraq xidmət edən bir əsgər  “Biz cəbhə xəttindəykən Yair Mayamidə həyatdan həzz alır. Müharibəyə görə məsuliyyət daşıyanların yerinə işini, ailəsini, övladlarını qoyub ölkəni müdafiə edən bizik. Qardaşlarımız, atalarımız, oğullarımız hamısı cəbhəyə gedir və Yair hələ də burada deyil”, deyə söyləyib.

Digər bir əsgər də mediaya açıqlamasında “Amerikadan ölkəmə qayıtdım, orada işim, həyatım var idi. Bu kritik dövrdə orda qalıb xalqımı tərk etməyim mümkün deyildi. Bəs baş nazirin oğlu haradadır? Niyə İsraildə deyil?”, deyə söyləyib.

Qeyd edək ki, İsraildə 18 yaşdan yuxarı hər kəs üçün hərbi xidmət məcburidir. Kişilər 32 ay, qadınlar isə 24 ay xidmət etməlidirlər. Məcburi xidməti başa vuranlar 40 yaşına kimi “ehtiyat əsgər” kimi çağırıla və müharibə vaxtı nizami qoşunlarla bərabər döyüşə bilərlər.

Günay