Türkiyə İsveçin NATO üzvlüyünü Rusiyaya görə yubadır? - AÇIQLAMA

İsveçin hələ də NATO-ya üzv qəbul edilməməsi müzakirə obyektinə çevrilib. Ötən gün Ankaradakı diplomatik mənbənin açıqlamaları bu mövzunu yenidən gündəmə gətirib.

Belə ki, sözügedən şəxs “RİA Novosti”yə danışarkən, NATO-nun genişlənməsi ilə bağlı Türkiyəyə edilən təzyiqlərin əbəs olduğunu vurğulayıb: “İsveç NATO-ya üzvlüklə bağlı ərizənin bir neçə həftə ərzində təsdiqini gözləyir. Sənəd çətin ki, yaxın müddətdə təsdiqlənsin. Bu məsələdə son sözü Türkiyə deyəcək”.

Bəs Türkiyə İsveçin NATO-ya üzvlüyünü niyə uzadır?

Mövzu ilə bağlı Sfera.az-a açıqlama verən siyasi şərhçi Kənan Novruzov deyib ki, bunun iki əsas səbəbi var:

“İsveç terrorçuları dəstəklədiyinə, Türkiyənin təhlükəsizlik maraqlarını görməzdən gəldiyinə görə Ankara bu dövlətin strateji maraqlarını nəzərə almır. Digər tərəfdən, Türkiyə həm də Avropa İttifaqına gedən yolunun açılmasını tələb edir. Ərdoğan bu barədə mövqeyini açıq ifadə edib - gərək Ankaranın Aİ-yə üzvlüyü yolundakı əngəllər aradan qaldırılsın ki, Türkiyə də İsveçin üzvlüyünü ratifikasiya etsin. NATO-nun genişlənməsi Rusiyanın təhlükəsizlik maraqlarının təhdid edilməsi deməkdir və Ankara bunu istəmir. İsveçin alyansa üzvlüyünün ratifikasiya edilməsi nəticəsində Moskva ilə münasibətlər pisləşə bilər. Odur ki, Ankara hələ tələsmir”.

Müsahibimiz bildirib ki, digər səbəblərdən biri Türkiyənin tədarükünü gözlədiyi ABŞ istehsallı F-16 qırıcı təyyarələri ilə bağlıdır:

“Uzun illərdir, bu məsələ ilə bağlı müzakirə gedir, amma Vaşinqton qırıcıların tədarükünü ləngidir.  NATO-nun genişlənməsi ABŞ-nin əsas məqsədlərindən biridir. Bu baxımdan, Ağ Ev Türkiyənin maraqlarına uyğun addım atmalıdır ki, Ankara da Stokholmun üzvlük ərizəsini təsdiqləsin. Ümumiyyətlə, NATO-nun genişlənməsi yaxın gələcək üçün real deyil. Türkiyə prosesi mümkün qədər uzatmağa çalışacaq”.

Günay