“Tam hüquqlu Fələstin dövləti yaradılmalıdır” - Medvedyev

“İsrail-Fələstin münaqişəsi regional, hətta qlobal müharibəyə çevrilə bilər”.

Sfera.az bildirir ki, bunu Rusiya Təhlükəsizlik Şurasının sədr müavini Dmitri Medvedev deyib. O, qeyd edib ki, Moskva üçün Ukrayna savaşında uğur əldə etmək daha vacib olsa da, Fələstin və İsraildə baş verənlərə görə də narahatlıqları var.

“Hazırkı qarşıdurmanın nəticələri, çoxsaylı insan tələfatı, dağıntılar göz qabağındadır. Qəzzada yüzlərlə insanın ölümünə səbəb olan xəstəxanaya raket hücumu isə dəhşətli faciə idi. Çoxları ağır yaralanıb və onlar əlil qala bilərlər. Sözügedən hadisə xəstəxanalar və tibb işçilərinin beynəlxalq humanitar hüquqla qorunmasına baxmayaraq baş verib”, - Medevedev bildirib.

O həmçinin, xəstəxanaya hücumu qınayıb və bunu “barbar hərəkət” adlandırıb.

“Yaxın Şərqdəki münaqişə düzgün həll olunmasa, bu, yüzillik müharibəyə və ya qısamüddətli nüvə müharibəsinə çevrilə bilər. Problemi birdəfəlik həll etməyin yeganə yolu tam hüquqlu Fələstin dövlətinin yaradılması və 1947-ci ildən bəri qəbul edilmiş bütün fundamental siyasi qərarların həyata keçirilməsidir”, - deyə Medvedev əlavə edib.

Günay