ABŞ neft qiymətlərində mümkün yüksəlişin qarşısını almaq üçün Venesuelanın neft sənayesinə qarşı tətbiq etdiyi sanksiyaları yumşalda bilər. 

Sfera.az “Reuters”ə istinadən xəbər verir ki, sanksiyaların yumşaldılması üçün ABŞ-nin bir şərti var. ABŞ rəsmiləri sanksiyaların aradan qaldırılmasının müxalifətlə aparılan danışıqların nəticəsindən də asılı olacağını vurğulayıb. 

Venesuela hökuməti müxalifətlə uzun müddətdir ki, danışıqları dayandırmışdı. ABŞ danışıqların aparılacağı və nəticələrin müsbət olacağı təqdirdə sanksiyaları yumşaldacağını bildirib. ABŞ Nikolas Maduro hökumətindən müxalifətin siyasi fəaliyyətinə imkan yaradılmasını, seçkilərdə müxalifətin də namizədlərinin iştirakına şərait yaradılmasını istəyir. 

“Reuters” xəbər verir ki, Venesuelanın enerji sektoruna qarşı sanksiyaların yumşaldılması ölkədən neft ixracının artmasına səbəb olacaq. Bu, qlobal neft bazarlarında gərginliyin azaldılmasına kömək edə bilər. 

Venesuela dünyada ən böyük neft ehtiyatlarına sahib olan ölkə kimi tanınır. Amma sanksiyalar yumşaldılsa da əsas məsələ sərmayə qoyuluşunun artırılmasıdır. Sərmayə qoyuluşu kifayət qədər olmasa, istehsalı artırmaq və ixraca daha çox neft çıxartmaq mümkün olmayacaq. 

Qeyd edək ki, bu il Səudiyyə Ərəbistanı və Rusiya hasilatı kəskin azaldıb. İsrail və HƏMAS arasındakı müharibədən sonra isə neft tədarükü probleminin yaranması riski də var. Bəzi ərəb ölkələri neft və qaz hasilatını azaltmaqla bağlı təhdid xarakterli açıqlamalar da verib. 

Bu vəziyyətdə gözlənilər risklərdən yayınmaq üçün ABŞ Venesuelaya daha çox neft ixracı üçün imkan yaratmağa çalışır.

Vasif