PAŞA Holding-in dəstəyi ilə 3 ayı (Avqust - Oktyabr) əhatə etmiş multidisiplinar festivalın əsas məqsədi həssas qrupu - valideyn(lər)ini itirmiş, əlilliyi olan, məcburi köçkün, məişət zorakılığından əziyyət çəkmiş və s. təmsil edən qadınların dayanıqlı təşəbbüslərini və sahibkarlıq fəaliyyətini dəstəkləmək, onların sosiuma reinteqrasiyasını sürətləndirmək, həmçinin, mövcud fəaliyyətlərin davamlılığının təmin olunması üçün bilik və bacarıqlarının artırılması ilə yanaşı dəstək mexanizmlərinin genişləndirilməsinə təkan verməkdir.

14-15 oktyabr tarixlərini əhatə edən festivalın ilk günündə Gender Hub Azerbaijan sosial platformasının həmtəsiscisi və icraçı direktoru Məryəm Məcidova, KOBİA sədri Orxan Məmmədov, Böyük Britaniyanın Azərbaycandakı səfiri Fergus Auld OBE, BMT-nin Azərbaycandakı rezident əlaqələndiricisi Vladanka Andreyeva, AQSİA sədri Səkinə Babayevanın açılış nitqləri ilə başlayıb. Daha sonra rəsmilərin iştirakı ilə keçirilmiş mərasimdə sahibkar qadınlar sertifikatla təltif olunmuşdur.

Festival günlərində “Qadınlar Qadınlar üçün” və “Qadınlar Biznesdə” mövzuları üzrə qonaqların çıxışları da baş tutub. Biznes kouç Sevda Əliyeva, Azərbaycan Sahibkarlar Konfederasiyasının baş katibi Natəvan Məmmədova, Radio/ TV aparıcısı Nərmin Knyaz, psixoloq Gülnarə Əkbərova, VarYox platformasının həmtəsiscisi Sitarə İbrahimbəyli və tarixçi İradə Qədirovanın çıxışları həm festivalın iştirakçılarına, həm də sahibkar qadınlarına ilham olmuşdur. Qeyd edək ki, festivalda 11 oktyabr - Beynəlxalq Qız Uşaqları Günü ilə əlaqəli guşə yer alıb.

Ümumilikdə, festival boyunca 80 həssas qrupa mənsub sahibkar qadına həm bizneslərini professional şəkildə inkişaf etdirərək brendlərini yüksək keyfiyyətə çatdırmaq, həm də sonda 2000 nəfər alıcı kütləsinin cəlb olunması ilə 2 gün ərzində keçirilmiş satış sərgisində öz məhsullarını satmaları üçün imkan yaradılmışdır.