"Qazaxıstan çox irəliləyib, bizdə bu sahədə çox ciddi problemlər var" - Osman Gündüz
Qazaxıstanda ötən həftə növbəti beynəlxalq texnoloji forum - Digital Bridge Forum keçirilib. İnnovasiya və Rəqəmsal İnkişaf Agentliyi xətti ilə bu tədbirə qatılanlar olub.
Bəs bu forumda Azərbaycanla bağlı hansı təhlillər aparıldı?
Mövzu ilə bağlı Sfera.az-a açıqlamasında Azərbaycan İnternet Forumunun prezidenti Osman Gündüz bildirib ki, bu, çox böyük bir tədbirdir və bizdə bu sahədə çox ciddi problemlər var:
“Çox böyük bir tədbirdir. Qazaxıstan rəqəmsal transformasiyada, İT sektorda, innovasiyalar və ekosidtemin inkişafında, rəqəmsal hökumət quruculuğunda hədsiz çox irəliləyib. Xarici investisiyaların cəlbi, beynəlxalq şirkətlərin ölkədə oturuşması sahəsində ciddi uğurları var. Hökumət bu sektorda münbit şərait yaradılması üçün ciddi səylər göstərir.Xəzərin dibi ilə fiberoptik kanalın çəkilməsi istiqamətində Qazaxıstanla bizim aramızda, hökumətlər səviyyəsində təsdiqlənən Trans-Xəzər layihəsi var. Bir müddət öncə Prezident İlham Əliyev, həmçinin elə bu tədbirdə Qazaxıstan Prezidenti Tokayev də bu məsələyə toxunublar.
Baxıram ki, İnnovasiya və Rəqəmsal İnkişaf Agentliyi (İRİA) xətti ilə bu tədbirə qatılanlar olub. Bizdə bu istiqamətdə müəyyən addımlar atılsa da, çox ciddi problemlər də var. Gözləyirdim ki, Azərbaycan və Qazaxıstan arasında sektorun inkişafı ilə bağlı ciddi müqayisələr olacaq, ciddi təhlillər aparılacaq. Lakin hansısa bir təhlil, müqayisə görmədim.Sadəcə bir yazı gözümə dəydi. Hansı ki, orada Azərbaycan Qazaxıstanla müqayisədə "riskləri daim qiymətləndirərək çox diqqətli davranış" sərgiləyən ölkə olaraq xarakterizə edilib. Sadəcə bu qədər…”
Firuzə Əliyeva
