“Keçmiş ABŞ prezidenti Donald Tramp dünyada baş verən bütün mənfi hadisələrlə bağlı Bayden və onun administrasiyasını günahlandırır. Buna səbəb isə onun növbəti dəfə prezident seçkilərinə hazırlaşmasıdır”.

Sfera.az bildirir ki, bunu politoloq Elxan Şahinoğlu deyib. O xatırladıb ki, Tramp HƏMAS qruplaşmasının İsarilə hücumunu ABŞ-nin zəifliyi kimi qiymətləndirib:

“Tramp hesab edir ki, İsrailə hücum dünyada ABŞ-nin gücünə inamın azalmasına görə baş tutub. O bildirib ki, prezident seçkisində qələbə qazanarsa, İsrailə dəstəyini artıracaq, Fələstinə isə heç bir dəstək verməyəcək. Tramp Rusiya-Ukrayna müharibəsi ilə bağlı da fərqli mövqeyə malikdir. Onun fikrincə, ABŞ Ukraynanı dəstəkləməkdən imtina etməlidir. “Niyə zəif prezident Co Bayden Avropanı Ukraynaya lazım oln maliyyəni ayırmağa məcbur edə bilmir” sualını səsləndirən Tramp Rusiya-Ukrayna müharibəsinin maliyyə yükünün Vaşinqtonun üzərindən götürülməsini vacib hesab edir. Bu, o deməkdir ki, Donald Tramp növbəti seçkidə qələbə qazanarsa, ABŞ-nin Ukraynaya maliyyə və hərbi yardımı azala bilər. Bu isə Ukraynanı ağır vəziyyətə sürükləyəcək”.

Ekspert bildirib ki, Bayden Ukrayna savaşında dönüş yaratmaq istəyirsə, prezidentlik müddəti bitənə qədər bunu reallaşdırmalıdır: 

“Tramp Rusiya-Çin ittifaqına görə də Bayden və ondan əvvəlki prezident Barak Obamanın məsuliyyət daşıdığını bildirib. O qeyd edib ki, Vaşinqtonun siyasəti Moskva ilə Pekinin yaxınlaşmasının qarşısını almaq üzərində qurulmalıdır. Tramp bu məsələdə haqlıdır. Rusiya-Çin ittifaqı ABŞ-yə əlavə problemlər yaradıb. Moskva və Pekin yalnız ittifaqla kifayətlənmir, beynəlxalq məsələlərdə mövqelərini yaxınlaşdırırlar. Ancaq bu o demək deyil ki, Tramp prezident seçilərsə,  Çin-Rusiya ittifaqını zəiflədə biləcək. O, prezident olduğu illərdə Çinə qarşı iqtisadi məhdudiyyətlərin təşəbbüskarı olub”.

Günay