Çeçenistanın rəhbəri Ramzan Kadırov Sovet İttifaqının keçmiş lideri İosif Stalini xain adlandırıb.
 

Sfera.az xəbər verir ki, Qroznının 205 illiyi şərəfinə keçirilən tədbirdə təbrik nitqində Kadırov Stalini “satqın” adlandırıb. Çeçenistan liderinin çıxışı Vaynax Dövlət Televiziya və Radio Yayımları Şirkətinin teleqram kanalında dərc olunub.

Kadırov Stalinin çeçenlərə qarşı repressiyalarını xatırladıb və təəssüflə bildirib ki, o vaxt xalqın məsuliyyətini üzərinə götürəcək heç kim olmayıb.
"Bu gün heç kim deyə bilməz ki, çeçenlər satqındırlar. İosif Stalin təkcə çeçen xalqını deyil, həm də digər müxtəlif xalqları repressiyaya məruz qoymuş satqın idi"- Kadırov deyib.

Kadırov həmçinin Stalin dövründə Çeçenistanda respublika və xalq üçün məsuliyyət daşıyan olmadığını, bu gün isə kollektiv və məsuliyyətli qərarlar qəbul edən bütöv bir komanda yarandığını deyib.


Qeyd edək ki, Stalinin çeçenlərə qarşı repressiyalarını tənqid etmək Kadırovun ən sevimli mövzularından biridir. 2017-ci ildə o, SSRİ liderinin çeçen xalqını məhv etmək və onun yaddaşını yer üzündən silmək istədiyini də bildirib.

2023-cü ilin fevralında, 1944-cü ildə çeçenlərin Sibir və Qazaxıstana kütləvi qovulmasının ildönümündə Kadırov “lənətə gəlmiş Stalinin” çeçen və inquş xalqlarına qarşı aşkar cinayət və dəhşətli soyqırım törətdiyini dilə gətirib.

Aynil
Sfera.az