Lavrovdan Ermənistanla bağlı MÜHÜM AÇIQLAMA: “Əminəm ki, Paşinyan…”

“Rusiya ABŞ, Aİ və NATO-nun Cənubi Qafqazdakı maraqlarını Ermənistan vasitəsilə təşviq etmək cəhdlərini qeydə alır”.

Sfera.az bildirir ki, bunu Rusiyanın XİN başçısı Sergey Lavrov Bişkekdə MDB Xarici İşlər Nazirləri Şurasının iclasında deyib. O, qeyd edib ki, bölgədə antiRusiya əhval-ruhiyyəsinin güclənməsi süni xarakter daşıyır.

“Son illər Ermənistanda yaradılan qeyri-hökumət təşkilatlarının sayından xəbərimiz var. Bəli, onlar əvvəl də çox idi, amma bu təşkilatlar Ermənistanla Rusiya arasında dostluq münasibətlərinin inkişaf etdirilməsi məqsədi ilə yaradılmayıb. Tam əksi, onlar antiRusiya ovqatı üçün zəmin yaratmaq və Ermənistan vasitəsilə ABŞ, Aİ ölkələri və NATO-nun bu regionda maraqlarının təşviqinə yönəliblər”.

Lavrov bildirib ki, sözügedən addımlar müəyyən dərəcədə nəticələr yaradır: “Lakin biz əminik ki, erməni xalqının böyük əksəriyyəti Rusiya ilə ənənəvi qardaşlıq münasibətlərinin inkişafında maraqlıdır. Moskva İrəvanı fərqli istiqamətə çəkmək cəhdlərinə baxmayaraq, Paşinyanın xarici siyasət istiqamətlərinin dəyişməzliyi ilə bağlı səsləndirdiyi mövqeyin qalib gələcəyinə ümid edir”.

Xatırladaq ki, bundan əvvəl Ermənistan Baş naziri Nikol Paşinyan hökumətin xarici siyasətində dəyişiklik etmək niyyətində olmadığını demişdi. 

Günay