"Tesla" şirkətinin qurucu ortaqlarından JB Straubeli Bakıda keçiriləcək "InMerge" Innovasiya Sammitində iştirak edəcək.

Bunu Sfera.az-a açıqlamasında texnobloger Fərid Pərdəşünas deyib:

"Tesla" şirkətinin qurucu ortaqlarından sayılan amerikalı biznesmen JB Straubeli-nin Bakıda keçiriləcək "InMerge" Innovasiya Sammitində iştirakı təsdiqlənib. 

Qeyd edim ki, bu konfrans üçün "Apple"ın qurucu ortaqlarından olan Stiv Vozniak da Bakıya gələcək. 

"InMerge" Astronavtika Konqresindən sonra keçiriləcək regionun önəmli innovasiya tədbirlərindən biridir. Biletlər Astronavtika Konqresi qədər baha olmasa da yenə də adi şirkət əməkdaşları üçün yüksək sayılır. Bu səbəbdən iri şirkət rəhbərlərinə müraciət edirəm ki, dəyər verdiyiniz şirkət əməkdaşlarını bu tədbirə göndərin, onlara yatırım edin. Əmin olun, bu ən yaxşı yatırımlardan biri olacaq”.

Qeyd edək ki, regionun ən böyük innovasiya sammiti olan "InMerge Innovation Summit"I 30 noyabr və 1 dekabr tarixlərində "PAŞA Holding"in təşkilatçılığı ilə keçiriləcək.Artıq 3-cü ildir ki, təşkil olunan bu tədbir innovatorları, aparıcı texnologiya şirkətlərini, liderləri, startapları və eləcə də investorları bir araya gətirərək onlarla əlaqə yaratmaq, innovasiya ekosisteminə inteqrasiyalar etmək məqsədi daşıyır.Tədbirdə "Trendyol" şirkətlər qrupunun prezidenti Çağlayan Çetin, "PAŞA Holding"in baş icraçı direktoru Cəlal Qasımov, məşhur TED spikeri Michael Ringel və sahəsində özünü təsdiq etmiş onlarla şəxs də iştirak edəcək.Sammitdə elektron ticarət, sığorta texnologiyaları, süni intellekt, telekommunikasiya və daha bir çox mövzuda təqdimatlar ediləcək, müzakirələr aparılacaq və seminarlar baş tutacaq.
 

Firuzə Əliyeva