Partlayan "Titan" sualtı qayığından qalan dağıntı və insan qalıqları TAPILDI

Mühəndislər "Titanik"in araşdırılması üçün dalış edən zaman partlayan "Titan" sualtı qayığından qalan dağıntı və insan qalıqlarını tapıblar.

Sfera.az “BBC”yə istinadən xəbər verir ki, bu barədə ABŞ Sahil Mühafizəsi məlumat yayıb. Sahil Mühafizəsi rəsmiləri bildiriblər ki, gəminin əlavə hissələri keçən həftə dəniz dibindən çıxarılaraq ABŞ limanına aparılıb. Tibb işçiləri insan qalıqlarını analiz edəcəklər.

Qeyd edək ki, "Titan" sualtı qayığı onu hazırlayan şirkət “OceanGate” tərəfindən "eksperimental" kimi təsvir edilsə də, sualtı gəmi Şimali Atlantik Okeanında dəniz səviyyəsindən 3,800 m aşağıda yerləşən "Titanik" in batdığı yerə bir neçə dəfə dalış edib. Sualtı qayıq iyun ayında batan gəminin araşdırılması üçün dalış zamanı suyun sıx təzyiqi altında partlayıb.

Təyyarədə olan beş sərnişinin hamısı həlak olub. Şirkətin baş icraçı direktoru Stokton Raş da gəminin göyərtəsində olanlar arasında idi. Sualtıda ölən digər dörd sərnişin isə Britaniya-Pakistan əsilli iş adamı, 48 yaşlı Şahzadə Davud, onun oğlu19 yaşlı Süleyman, Britaniyalı iş adamı 58 yaşlı Hamiş Hardinq və Fransa donanmasının keçmiş dalğıclarından olan 77 yaşlı Paul-Henry Nargeolet olub. Sualtı gəminin axtarışı beynəlxalq marağa səbəb olub və ictimaiyyətin diqqətini çəkib. Partlayışdan sonra üzə çıxan ABŞ məhkəmə sənədləri göstərir ki, cənab Raş sualtı qayıqla bağlı təhlükəsizlik xəbərdarlıqlarına məhəl qoymayıb.

Dünyanın müxtəlif yerlərində dalışlar təşkil edən “OceanGate” fəlakətdən sonra bütün fəaliyyətini dayandırıb.

Fəlakətlə bağlı beynəlxalq araşdırma davam edir və Sahil Mühafizəsi gələcək tarixdə ictimai dinləmənin keçiriləcəyini bildirib.

Firuzə Əliyeva