Son illərdə Azərbaycanın ali təhsil müəssisələrində təhsil alan tələbələrin sayı artsa da ölkəmiz hələ də MDB-də hər 10 min nəfərə düşən tələbə sayına görə geridə qalan ölkədir.

Sfera.az xəbər verir ki, son 15-20 ildə Azərbaycanda tələbələrin sayında ciddi artım baş verib. Hər 10 min nəfərə 2005-ci ildə 154 tələbə düşdüyü halda, 2020-ci ildə 200, 2022-ci ildə 220 tələbə düşüb. Qeyd edilən dövr ərzində tələbə sayı 43 faiz artıb. 

Bu artıma baxmayaraq, Azərbaycan Tacikistanla birlikdə MDB-də ən az tələbəsi olan ölkədir. 

2022-ci ilin məlumatına görə, hər 10 min nəfərə düşən tələbə sayı Qırğızıstan, Qazaxıstan, Özbəkistan, Rusiya və Türkmənistanda daha çoxdur. Hər 10 min nəfərə Qırğızıstanda 323, Qazaxıstanda 293, Özbəkistan və Türkmənistanın hər birində 289, Rusiyada 282 tələbə düşür. Bu göstərici Ermənistanda 267, Belarusda 259, Ukraynada 254, Moldovada 224-dür. 

Bununla belə qeyd edək ki, adıçəkilən ölkələrin əksəriyyətində son 15 ildə tələbə sayında azalma prosesi gedir. Yalnız Azərbaycan, Özbəkistan və Tacikistanda tələbə sayı artır.

Vasif