Lirə və rubl manat qarşısında ucuzlaşır – SON MƏZƏNNƏLƏR

Manatın Türkiyə lirəsi və Rusiya rubluna qarşı bahalaşması davam edir.

Sfera.az xəbər verir ki, Mərkəzi Bankın elan etdiyi rəsmi məzənnəyə əsasən, bir manat 59,2 rubla və 16,3 lirəyə bərabərdir. Başqa sözlə, hazırda 100 rubl 1,7 manata, 100 lirə 6,14 manata dəyişdirilir. Avqustun 25-26 tarixlərində 100 lirə 6,5 manat, mayda isə 8,6 manat idi. Son 5 ayda lirənin manat qarşısında 29 faiz ucuzlaşması qeydə alınıb. May ayından sonra rublun dəyərində də ciddi enmə müşahidə olunub. Beş ay əvvəl 100 rubl 2,21 manat idi. Müqayisə göstərir ki, ötən müddətdə rubl manata nisbətən 23 faizdən çox ucuzlaşıb.

Rusiya və Türkiyə Azərbaycanın qeyri-neft məhsullarının ticarətində əsas tərəfdaşıdır. Buna görə də lirə və rublun ucuzlaşması Azərbaycana idxal edilən malların dəyərinin düşməsinə də səbəb olur ki, bu da idxal inflyasiyasına azaldıcı təsir göstərir. Azərbaycanda rubl və lirənin ucuzlaşması ABŞ dollarının həmin valyutalara qarşı bahalaşması ilə bağlıdır. Hazırda bir dollar 27,6 lirəni və 100 rublu keçib. Dolların manata qarşı məzənnəsi sabit olduğundan dolayısı ilə manat da həmin valyutalara nisbətən bahalaşır.

Vasif