BMT-dən Quranın yandırılmasına REAKSİYA: “Gələcək aylarda...”
“Qurana qarşı hörmətsizliyi, xüsusən də açıq-aşkar zorakılıq və düşmənçilik yaratmaq məqsədi daşıyan hərəkətləri qəti şəkildə rədd edirəm”.
Sfera.az bildirir ki, bunu BMT-nin İnsan Haqları üzrə Ali Komissarı Volker Turk deyib.
O, BMT İnsan Haqları Şurasının iyul sessiyasında Qurana qarşı edilən hücumlarla bağlı fövqəladə xüsusi iclasın keçirildiyini xatırladıb:
“İclasdan sonra bəzi ölkələrdə Qurani-Kərimin ictimai yerlərdə yandırılması aksiyaları davam edir. Bir daha vurğulamaq istəyirəm ki, mən bu hörmətsiz və aqressiv xüsusən də açıq-aşkar zorakılığı və parçalanmanı qızışdırmaq məqsədi daşıyan hərəkətləri qəti şəkildə rədd edirəm. İnsan Haqları Şurasının 53/1 saylı qətnaməsi dünyada ibadət yerlərinə və dini simvollara qarşı hücumların artdığını qeyd edib və bu problemin həlli üçün təcili tədbirlər görülməsinə çağırıb. Biz gələcək aylarda perspektivli tövsiyələr hazırlamaq üçün geniş məsləhətləşmə prosesini asanlaşdıracağıq. Xüsusilə, təcrübə və anlayışa əsaslanan rəy və təkliflərinizi almağı səbirsizliklə gözləyirəm. Artıq bəzi dövlətlərdən cavablar almışıq”.
O, fikirlərini bu cür davam etdirib: “11 sentyabr terror aktlarından sonra İslamofobiyanın yeni versiyalarını görürük. Xüsusilə, Avropa, Asiya və Şimali Amerikada zərərli stereotiplər daha da dərinləşir. Müsəlmanlar çox vaxt şifahi təhqir, hədə-qorxu və ölümlə hədələmə və ya daha pisi fiziki zorakılığın ağır yükünü daşıyırlar. Dini nifrət və ayrı-seçkiliyin insan hüquqlarına təsiri açıqdır. Bu, ictimai tərəqqiyə mane olur və onu qütbləşdirir, insanların həyatına real təsir göstərir”.
Türkan
