Azərbaycan vətəndaşlığı alan Qarabağ erməniləri ilə bağlı AÇIQLAMA
Ötən gün bir qrup Qarabağ ermənisi vətəndaşlıq üçün Azərbaycana müraciət edib. Belə ki, ilkin qeydiyyata alınmaq üçün Xankəndi şəhərində yerləşən qəbul şöbəsinə 5, bölgədə keçirilmiş səyyar qəbul zamanı isə 2 sakin könüllü şəkildə Dövlət Miqrasiya Xidmətinə gəlib. Müraciət edənlərin hər biri Qarabağ iqtisadi rayonunda yaşamaq və Azərbaycan Respublikası vətəndaşlığını əldə edərək Azərbaycan dövlətinin himayəsindən istifadə etmək istədiklərini bildiriblər.
Maraqlıdır, Qarabağ ermənilərinin Azərbaycan vətəndaşlığı əldə etməsi necə həyata keçiriləcək?
Sfera.az-ın məlumatına görə, bununla bağlı fikirlərini bölüşən politoloq Zaur Məmmədov xatırladıb ki, erməni sakinlərin yaşadıqları ərazilərdə idarəetmə Azərbaycan Prezidentinin xüsusi nümayəndəlikləri vasitəsilə həyata keçirilir:
“Həmçinin, Qarabağda Azərbaycan manatının tam tədavülə keçməsi təmin edilir. Odur ki, burada yaşayan erməni sakinləri ölkə üzrə əməyin ödənişi və sosial ödənişlər sistemi ilə əhatə olunacaq. Onlar eyni zamanda, səyyar xidmətlərdən , yəni “ASAN” və “DOST”dan faydalanacaqlar”.
Ekspert qeyd edib ki, Qarabağ bölgəsində yaşayan erməni sakinlər daxili işlər orqanlarına işə cəlb oluna bilərlər:
“Həmçinin, Qarabağda erməni dilinin istifadəsinə də imkan yaradılacaq. Fikrimcə, ermənilər bələdiyyələrə cəlb oluna bilərlər”.
Günay
