Azərbaycanda əhalinin banklara olan borcunun məbləği açıqlanıb.

Sfera.az xəbər verir ki, 2023-cü ilin sentyabrın 1-də əhalinin banklara borcu 12 milyard 656 milyon manat təşkil edib. Əhalinin banklardan başqa 408 milyon manat bank olmayan kredit təşkilatlarına da borcu var.

Ümumilikdə, əhalinin kredit borcu 13,064 milyard manatdan çoxdur. Son bir ildə əhalinin kredit qurumları qarşısında olan borcu kəskin artıb. Bir il əvvəl banklara olan borc 10 milyard manat, digər təşkilatlara olan borc 319 milyon manat idi.

Son bir ildə əhalinin aldıqları kreditlərə görə yaranan borcu 2,746 milyard manat, yəni 21 faiz artıb. Əhali banklardan aldığı borcun 2,646 milyard manatını biznes məqsədilə götürüb.

Qeyri-bank kredit təşkilatlarından biznes məqsədilə nə qədər borcun alındığı isə açıqlanmır. Bunlardan başqa əhali 3,46 milyard manat ipoteka məqsədilə, 6,53 milyard manat isə istehlak məqsədilə borca girib. Hər 3 məqsədlə alınan borclarda sürətli artım baş verir.

Qeyd edək ki, biznes məqsədilə alınan borclar əhalinin gəlirlərinin artmasına xidmət edir. Amma ipoteka və istehlak kreditləri üzrə alınan borclar əhalinin xərclərinin artmasına səbəb olur.

Vasif