ABŞ-də Ukraynaya edilən yardımların azaldılması təklif edilir.

ABŞ Senatı təklif edib ki, Ağ Ev Kiyevə ayrılan maliyyəni 24 milyard dollardan 6,15 milyard dollara qədər azaltmağı təklif edib. Pentaqon məbləğin 4,5 milyarda, ABŞ Dövlət Departamenti isə 1,65 milyard dollara qədər azaltmağı doğru hesab edir. Bununla bağlı təklif büdcəyə dəyişiklik layihəsində də öz əksini tapıb.

Bununla bağlı Sfera.az-a açıqlama verən politoloq Məhəmməd Əsədullazadə deyib ki, Rusiyanın savaşı qazanmaq şansı Qərbin, xüsusilə ABŞ-nin Ukraynaya yardımlarının azaldığı halda baş verə bilər:

“Bu, geopolitik qarşıdurmadır. Əlbəttə, ABŞ Ukraynaya maliyyə yardımlarını, dəstəyini azaldarsa, bu, müharibənin taleyinə mənfi təsir edə bilər. Belə olacağı halda, Rusiyanın mövqelərinin də kifayət qədər güclənməsi ehtimalı var. ABŞ-də büdcəyə dəyişikliklərdə yardımın azaldılmasının nəzərdə tutulması Moskvanın maraqlarına xidmət edir”.

Müsahibimiz bildirib ki, ABŞ senatorları reallığı düzgün qiymətləndirə bilmirlər:

“Proses Rusiyanın qələbəsinə doğru yönəlir. Nəticədə Vaşinqtonun  beynəlxalq müstəvidə mövqeyi kifayət qədər zədələnə bilər. Hesab edirəm ki, Ağ Ev, həmçinin Pentaqon bu cür çağırışların, təkliflərin qarşısını alacaq. Çünki baş verən yardımların azalması həm də ABŞ-nin Avropa siyasətini təhlükəyə atır. Vaşinqtonun oradakı mövqeləri ciddi şəkildə zəifləyə bilər. Fikrimcə, ABŞ-də düşünən beyinlər buna imkan verməyəcək”.

Günay Rəsulqızı