Rusiyanın bu qərarı bəzi ölkələri çətin vəziyyətə salacaq - STATİSTİKA
Rusiya hökumətinin benzin və dizelin ixracına tətbiq etdiyi qadağa Gürcüstan, Türkiyə və Braziliyanın neft məhsulları ilə təminatında çətinlik yarada, qiymətlərin artmasına səbəb ola bilər.
Sfera.az RBK-nın araşdırmasına əsasən xəbər verir ki, əsas çətinliklə Gürcüstan üzləşəcək.
Gürcüstan Rusiya yanacağının tədarükünü əvəz etməkdə çətinlik çəkəcək. Çünki 2023-cü ilin birinci yarısında Gürcüstan 554,2 min ton neft məhsulları idxal edib ki, bunun da 81,1 faizi Rusiyanın payına düşür.
Rusiya dizel yanacağının ən böyük alıcısı isə Türkiyədir. 2023-cü ilin birinci yarısında ölkə 7,77 milyon ton (bütün Rusiya tədarükünün 30%-dən çoxu) idxal edib ki, bu da ötən illə müqayisədə dörd dəfə çoxdur.
Əvvəllər praktiki olaraq Rusiyadan dizel yanacağı almayan Braziliya və Səudiyyə Ərəbistanı da 2023-cü ilin birinci yarısında idxalı kəskin şəkildə artıraraq müvafiq olaraq 2,8 milyon və 2,76 milyon tona çatdırıblar.
Bu ölkələrdən başqa Nigeriya, Birləşmiş Ərəb Əmirliyi də Rusiyadan böyük həcmdə yanacaq alır.
Rusiyalı ekspertlər hesab edir ki, qısa müddət ərzində dünya bazarında rus dizelini əvəz edən ölkə tapmaq mümkün olmayacaq. Məhz bu səbəbdən RBK yazır ki, Rusiyanın qadağasından sonra Avropada dizel yanacağının qiyməti 4,5% artaraq bir ton üçün min dolları ötüb.
Vasif
