“İran Cənubi Qafqazdakı gərginliyi diplomatik yolla həll etmək istəyir”.

Bunu ABŞ-nin Müharibə Araşdırmaları İnstitutundan bildiriblər. Amerikalı analitiklər son həftələrdə İran təmsilçilərinin Azərbaycan, Türkiyə və Ermənistan rəsmiləri ilə telefon danışıqlarına və görüşlərinə diqqət çəkərək bu qənaətə gəldiklərini açıqlayıblar.

Bununla bağlı Sfera.az-a açıqlama verən siyasi şərhçi Kənan Novruz deyib ki, rəsmi Tehran gərginlikdən mümkün qədər çəkinməyə çalışır:

“Tehranın bu qərarında Türkiyənin də mühüm rolu var. İran əmindir ki, “suları bulandırmağa” cəhd etsə, Türkiyə prosesə müdaxilə edəcək. Həmçinin, ABŞ-la Ermənistan arasındakı birgə hərbi təlim İranın xoşuna gəlməyib. Rəsmi Tehran bu barədə mövqeyini açıq ifadə edib. İrəvanın Tehranın maraqlarına zidd addımlar atması, şübhəsiz, İranın regionla bağlı daha adekvat mövqe ortaya qoymasına səbəb olur”.

Ekspert bildirib ki, İran Zəngəzur dəhlizinin açılmasının qaçılmaz olduğunu bilir: “Hətta məsələ bu il həllini tapa bilər. Ona görə də rəsmi Tehran destruktriv mövqeyin mənasız olduğunu başa düşür. Tehran, yəqin, bundan sonra da mövcud gərginliyin aradan qalxmasına çalışacaq. İranın bu istiqamətdə müəyyən addımlar atması gözləniləndir. Amma cənub qonşumuz gələcəkdə yenə də ritorikasını dəyişə bilər”.

Günay Rəsulqızı