Artıq tədris ilinin başlanmasına sayılı günlər qalıb. Elə bu səbəbdən də müvafiq dükan və bazarlarda canlanma müşahidə olunur. Son günlər xüsusilə məktəbli formaları müzakirə obyektidir. Təxminən 1 ay əvvəl məktəbli forması indiki qiymətindən aşağı təklif edilsə də, hazırda tam əksi hal müşahidə olunur. 

Bununla bağlı Sfera.az-a açıqlama verən iqtisadçı-ekspert Xalid Kərimli deyib ki, geyim bazarı dövlət tərəfindən tənzimlənmir:

“Ümumiyyətlə, dünyanın heç bir yerində dövlət bu bazarı tənzimləmir. Burada kifayət qədər məhsul təklif edənlər var, yəni geyim rəqabətin çox olduğu sahələrdən biridir. Nə qiymətlər tənzimlənə bilər - bu, bazar iqtisadiyyatının qaydalarına uyğun deyil, nə də burada monopolist olduğunu demək olar. Dövlət məktəbli geyimlərinin xarici görünüşünə standart müəyyənləşdirə bilər – rəngi, forması, ölçüsü və.s Vətəndaşlara forma almaq üçün konkret yerlər təklif edilmir. Lakin bizdə ənənəvi olaraq tədris mövsümündə məktəbli geyimlərinin qiyməti bahalaşır, yaxud Qurban bayramı ərəfəsində yararlı heyvanların satış qiyməti kəskin qalxır. Bu, sadəcə tələb-təklif mexanizmi əsasındadır”.

Müsahibimiz vətəndaşların işlərini doğru planlaşdırıb bazarlığı son ana saxlamamalı olduğunu vurğulayıb:

“Tələbatın eyni vaxtda kəskin qalxması bazarın şərtlərinə uyğun olaraq qiyməti artırır. Bu dönəmi də həvəslə gözləyən sahibkarlar var. Yəni bu, cəmiyyətin hər zaman qarşılaşdığı vəziyyətdir və qeyri-adi nəsə yoxdur. Vətəndaşlar axtarışlarını davam etdirib daha əlverişli bazarlıq etmək üçün çalışmalıdırlar. Yerli bazarla yanaşı, onlayn satışların olduğunu da bilirik, alternativlər kifayət qədərdir. Xüsusilə karqo daşımaları ön plana çıxandan bəri geyim bazarında rəqabət artıb. Bu baxımdan, qiymət həssaslığı mövcuddursa, vətəndaşlar işlərini daha yaxşı planlaya bilərlər. Buna dövlət nəsə edə bilməz. Sahibkarın qarşısına tələb qoymaq mümkün deyil”.

Günay Rəsulqızı