Son 70 gündə beynəlxalq birjalarda neftin bahalaşması Azərbaycana ixrac etdiyi “qara qızıl”ı daha yüksək qiymətə satmağa imkan yaradıb. 

Sfera.az xəbər verir ki, bu ilin iyunun sonlarında “Brent” markalı neftin qiyməti 72 dollara qədər enmişdi. Azərbaycanın ixrac etdiyi “Azeri Light” markalı neftin qiyməti isə həmin günlərdə 76-77 dollara qədər düşmüşdü. 

Lakin iyuldan neft qiymətlərinin yüksəlişə keçməsi hesabına  “Azeri Light” markalı neftin qiyməti də artıb. Dünən “Azeri Light” markalı neftin bir barelinin qiyməti 0,63 dollar artaraq 97,06 dollar olub. 

Müqayisə göstərir ki, son 70 gündə ixrac etdiyimiz neftin qiyməti 20 dollardan çox, yəni 27 faizə yaxın artıb. 

Neftin bahalaşması Azərbaycanın “qara qızıl” satışından proqnozdan artıq gəlir əldə etməsinə şərait yaradır. 2023-cü ilin dövlət büdcəsində neftin ortaillik qiyməti 60 dollardan hesablanıb. Mövcud qiymətlər proqnoz qiymətdən xeyli yüksəkdir. Bu vəziyyət Azərbaycanın ixracının həcminin artmasına, dövlət büdcəsinin gəlirlərinin artmasına və Dövlət Neft Fondunun aktivlərinin yüksəlməsinə səbəb olacaq. 

Vasif