Deputat Fazil Mustafa ölkədəki qurumların işindən narazılıq edib.

Sfera.az bildirir ki, o, bu barədə sosial şəbəkə hesabından fikirlərini bölüşüb.

“Bir orta məktəb müəllimi İsmayıllıdan gəlib ki, Koreyadan sifariş edərək gətirtdiyi maşını götürsün. Gömrükdən yaşıl kart almalıdır ki, aparıb DYP-yə təqdim etsin. Üç göndür, gömrüyün qapısında gözləyir ki, inspektor insafı gəlib, onu yola salsın. Adam məktəbə də izah edə bilmir ki, bu səbəbdən gələ bilmir. Digər bir adam uşağını dövlətin bağçasına qoya bilmir. Yer yoxdur, növbəyə durmalısan deyib, süründürməçiliyə salırlar. Digər bir adam illərdir sənəd ala bilmir ki, bəs filan banka borcun var. Məhkəmə qərarı ilə sübut edir ki, heç bir borcum yoxdur, yenə də süründürməçiliyə salıb bir arayışı vermirlər. Hətta gedib həmin bankdan kredit borcu götürür və məlum olur ki, borcu yox imiş. Başqa biri tamamailə haqlı olduğu iş üçün məhkəməyə müraciət edə bilmir. Düşünür ki, vəkilə filan qədər pul ödəməliyəm, 6-7 ay məhkəmə instansiyaları arasında ayaq döyməliyəm, təminatım da yoxdur ki, xeyrimə qərar çıxarılacaq. Yüzlərlə bu sayaq vətəndaşın problemi həllini tapmır”.

F.Mustafa qeyd edib ki, ölkədə adi və sadə problemlərin həlli mümkün olmur:

“Dövlət qurumlarının bir çoxu ilə təmasda olan insanların iztirabı göstərir ki, durum xoşagələn deyil. Adam bir qurumun həll etməli olduğu məsələ ilə bağlı on instansiyaya qəbula gedir, poçta o qədər vəsait xərcləyir, həm vaxt inkisinə, həm də maddi-mənəvi itkiyə məruz qalır. Məmur məsuliyyətsizliyi isə pik həddədir və bizlər də təsir göstərməkdə çətinlik çəkirik”.

Türkan