Azərbaycanda işçi bir saata nə qədər qazanır? – STATİSTİKA
Azərbaycanda çalışan işçilərin 1 saatlıq qazancı 6,83 manatdır.
Sfera.az Dövlət Statistika Komitəsinə istinadən xəbər verir ki, 2022-ci ildə işçilərin saatlıq qazancı 83 qəpik artıb.
Qeyd edək ki, işçinin qazancı dedikdə aldığı əməkhaqqı, həmçinin əməkhaqqına daxil edilməyən digər ödəniş və xərclər nəzərdə tutulur. Yalnız əməkhaqqı nəzərə alındığında isə işçilərin saatlıq qazancı daha azdır.
Sahələr üzrə götürdükdə işçilərin bir saatlıq əməyinə görə ən yüksək pul mədənçıxarma sənayesində verilir. Burada işçi bir saata orta hesabla 26,7 manat qazanır.
Maliyyə və sığorta fəaliyyəti, peşə, elm və texniki fəaliyyət, informasiya və rabitə, dövlət idarəedilməsi, nəqliyyat sahələrində də işçinin qazancı yüksəkdir. İşçinin saatlıq qazancı maliyyə və sığorta sahələrində 16,4 manat, peşə, elm və texniki fəaliyyət sahələrində 11,7 manat, informasiya və rabitədə 10,6 manat, dövlət idarəedilməsində 9,6 manat, nəqliyyatda 9,4 manat olub.
Azərbaycanda ən az qazanan işçilər isə inzibati və yardımçı xidmətlər sahəsində, kənd təsərrüfatında və ticarət sahələrində çalışanlardır. İnzibati və yardımçı xidmətlər sahəsində çalışanlar bir saata 3,9 manat, kənd təsərrüfatında çalışanlar 4,1 manat, ticarət sahəsində işləyənlər isə 4,5 manat qazanıblar.
Vasif
